नेवाः युट्युबया लसता हना ज्याझ्वः

येँ (नेपालभाषा टाइम्स) – नेवाः युट्युब च्यानल निदँ फुनाः स्वदँ क्यंगु लसताय् छगू लसता हना ज्याझ्वः जुल । वंगु शुक्रवाः जूगु ज्याझ्वलय्मू पाहांकथं येँ महानगरपालिकाया प्रमुख विद्यासुन्दर शाक्य झायादीगु खः ।

सुजीव वज्राचार्यया सभापतित्वय् जूगु ज्याझ्वलय् विशेष पाहांकथं नेपाल संवत् न्हूदँ राष्ट्रिय समारोह समिति-११४१ या नायः रमेश महर्जन झायादीगु खः । ज्याझ्वलय् मुँज्याया नायः वज्राचार्यं मेट्रो एफएमया नेपालभाषा ज्याझ्वः न्ह्याकामि मदुम्ह विक्रम शाक्यया जहान धनलक्ष्मी शाक्ययात लुमन्ति पौ लःल्हानादीगु खःसा वय्कःयात आर्थिक ग्वाहालि चेतना श्रेष्ठं लःल्हानादीगु खः ।

उगु ज्याझ्वलय् नेवाः युट्युब प्रशारणया निंतिं थीथीकथं ग्वाहालि यानादीपिं व्यक्तित्वनापं संघसंस्था व निरन्तर रुपं विज्ञापन बियाः ग्वाहालि यानादीम्ह निरञ्जनरत्न शाक्ययात मूपाहां येँ मनपा प्रमुख शाक्यं सम्मान नं यानादीगु खः । एड जोन प्रा.लिं. न्ह्याका वयाच्वंगु च्यानल स्वदँ क्यंगु लसताय् जूगु लसता ज्याझ्वय् पवित्र कसालं लसकुस यानादीगु खःसा उमेश स्थापितं सुभाय् देछानादीगु खः ।

नेवाः युट्युब च्यानलं नेपालभाषाया थीथी गतिविधिया प्रत्यक्ष प्रशारण यायेगु नापं नेवाः म्येँया म्युजिक भिडियो व चीहाः संकिपा नं निर्माण याना वयाच्वंगु दु ।

सम्बन्धित बुखँ

LEAVE YOUR COMMENTS