नेपाली संकिपाय् स्टार किड्स

नेपाली संकिपा ख्यलय् लिपांगु इलय् आपालं न्हू न्हूपिं कलाकारत खने दया वयाच्वंगु दु । न्हू न्हूपिं कलाकार जक मखु नेपाःया संकिपा ख्यःया नांजाःपिं ‘स्टार’ कलाकारतय् मस्त नं धमाधम थ्व ख्यलय् पलाः न्ह्याकेगु क्रम अप्वःया वयाच्वंगु द ।
थ्व झ्वलय् छगू इलय् नेपाःया हे नांजाःम्ह अभिनेता शिब श्रेष्ठ व नांजाःम्ह नायिका करिश्मा मानान्धरया काय व म्ह्याय् नं संकिपा ख्यलय् खने दयेकः वयेधुंकूगु दु । धायेगु खःसा नेपाःया सँकिपा ख्यःयात लिपागु इलय् न्हूपिं कलाकारतय्सं कुबियाच्वंगु दु धाःसां जिउ । प्रर्दशनय् वयाच्वंगु हरेक सँकिपाय् न्हूपिं कलाकारत खने दयाच्वंगु दु ।

िछगू इलय् नेपाःया संकिपा ख्यलय् अतिक लोकंह्वाःम्ह नायक शिव श्रेष्ठया काय शक्ति श्रेष्ठ व नेपाली संकिपा ख्यःया छम्ह सदाबहार नायिकाकथं बय्बय् जुयाच्वंम्ह करिश्मा मानान्धरया म्ह्याय् कविता मानान्धरं ‘एउटा यस्तो प्रेम कहानि’ नांया संकिपापाखें थ्व ख्यलय् पलाः न्ह्याकेधुंकूगु दु । शिव श्रेष्ठ व करिश्मा मानान्धरं नं आपालं संकिपाय् जोडी जुयाः अभिनय यानादीगु दु । आः वयाः शिव श्रेष्ठया काय शक्ति श्रेष्ठ व करिश्मा मानन्धरया म्ह्याय् कविता मानान्धर नं जोडी जुयाः खने दयेकः वइगु जूगु दु । लिपागु इलय् प्रदर्शनय् वःगु आपालं नेपाली संकिपायात स्वयेगु खःसा उकी छगू इलय् नेपाःया संकिपा ख्यलय् नाःजाःपिं स्टारतय् मस्त हे खने दयाच्वंगु दु । थः मस्तय्त संकिपा ख्यलय् ‘इन्ट्री’ याकेगु निंतिं अज्याःगु संकिपाय् मांअबु थःपिंसं हे लगानी याना निर्माता जुइगु यानाच्वंगु नं खनेदु । अथे हे नायक शिव श्रेष्ठ थम्हं हे लगानी यानाः थः काय शक्ति श्रेष्ठयात हिरो याःगु खनेदु ।

नेपाली संकिपाय् स्टार पुत्रतय् चर्चा यायेबलय् नायक भुवन के.सी.या काय अनमोल के.सी.या नां दकलय् न्ह्यःने वइ । अनमोल के.सी. थौंया ल्याय्म्ह पुस्ताया दथुइ अतिकं लोकंह्वाना च्वंम्ह नायक खः । अथेला अनमोलया नेपाली संकिपा ख्यलय् प्रवेश नं थः अबु भुवन के.सीं. निर्माण याःगु ‘साथी म तिम्रो’ सँकिपाय् छगू बःचा हाकःगु अभिनयपाखें हे जूगु खः । वयां लिपा ‘होस्टल’ संकिपाय् न्हापांखुसी हिरो जुयाः खने दयेकः वःम्ह अनमोल के.सी.या अभिनययात स्वकुमिपिंसं ययेकूगु जक मखु वयागु आपालं संकिपां व्यापारय् नं बालाक सफलता प्राप्त याःगु खनेदु । थ्व दथुइ अनमोल के.सी.या अतिकं चर्चित संकिपा ‘कृ’ प्रदर्शनय् वये धुंकूगु दुसा थांैकन्हय् अनमोल थः हे अबु भुवन के.सीं. निर्माण यानाच्वंगु संकिपा ‘क्याप्टेन’य् ब्यस्त जुयाच्वंगु दु ।

शिव श्रेष्ठ, भुवन के.सी., करिश्मा मानान्धरया जक मखसे मेमेपिं नं आपालं संकिपाकःमितय् मस्त नेपाली संकिपाय् खने दयेकः वयाच्वंगु दु । नेपाली संकिपा निर्माता, निर्देशक नापं कलाकार शोभित बस्नेतया काय सलोन बस्नेत नं थ्व ख्यलय् खने दयेकः वये धुंकूगु दु । मचा कलाकारया रुपय् नेपाली संकिपा ख्यलय् दुहां वःम्ह सलोन बस्नेत लिपांगु इलय् नायकया रुपय् स्वयां नं सहायक कलाकारकथं जक खने दयाच्वंगु दु धाःसां जिउ । अथेहे अप्वःथे सह–नायकया रुपय् जक खने दयाच्वंम्ह छम्ह स्टार सन खः गौरब पहाडी । नेपाली संकिपा अभिनेता टिका पहाडीया काय गौरब नेपाली संकिपाय् नायक जुयाः दुहां वःगु खःसां लिपांगु इलय् व छम्ह सह नायककथं जक खने दयेकः वयाच्वंगु दु ।

अथेहे सहायकया रुपय् जक खने दयेकः वयाच्वंम्ह मेम्ह छम्ह कलाकार संयम पुरी । निर्देशक–कलाकार नारायण पुरीया काय संयम पुरी सह कलाकारया रुपय् जक सीमित जुयाच्वंगु दु । संयम पुरी नं मचाकलाकार जुयाः हे थ्व ख्यलय् दुहां वःम्ह खः । अथे हे स्टार कलाकारया सन्तानया रुपय् थ्व ख्यलय् दुहां वयाः लोकंह्वाःम्ह नापं छम्ह अतिकं व्यस्तम्ह नायिका खः केकी अधिकारी । केकी अधिकारीं आपालं संकिपाय् नायिका जुयाः म्हितेधुंकूगु दु । अझ केकीं ला संकिपा निर्माण जक याःगु मखसे वं निर्माण याःगु संकिपा ‘कोहलपुर एक्सप्रेस’ प्रदर्शनय् नं वयेधुंकूगु दु । केकीं निर्माण याःगु कोहलपुर एक्सप्रेस हिन्दी संकिपा ‘मुम्बइ एक्सप्रेस’ या नकल धकाः धाइ ।

नेपाःया संकिपा ख्यःया नांजाःपिं कलाकारतय् आपालं सन्तानं थः मांअबुया पलाःख्वाँय् लिउलिउ जुइगु झ्वलय् संकिपाय् अभिनय यायेगु याःसां यक्वसिनं धाःसा निरन्तरता बियाच्वंगु खनेमदु । अप्वः थे स्टार सन्सत छगू निगू संकिपा लिपा थ्व ख्यलं तापाना वनाच्वंगु खनेदु । अभिनेत्री मदुम्ह शुशीला रायमाझीया म्ह्याय् प्रशिदिका रायमाझी पिँजडाय् नायिका जुयाः खने दयेकः वःगु खःसा मौसमी मल्लया काय बिक्कि मल्ल, नांजाःम्ह चरित्र अभिनेता मदनदास श्रेष्ठया काय रेमनदास श्रेष्ठ, निर्देशक मदुम्ह शिव रेग्मीया म्ह्याय् भावना रेग्मी, नांजाःम्ह हास्यकलाकार मदुम्ह गोपालराज मैनाली म्ह्याय् सज्जा मैनाली, निर्देशक शम्भु प्रधानया म्ह्याय् इश्वरी प्रधान, द्वन्द्व निर्देशक राजेन्द्र खड्गीया म्ह्याय् रागिनि खड्गीआदि छगू निगू संकिपा म्हिते धुंकाः थ्व ख्यलं तापाना वंगु दु ।

सम्बन्धित बुखँ

LEAVE YOUR COMMENTS