ने. सं. ११४४ कछलागा पारू -

पुनःनिर्माण सिधल, लः ज्वल

भुखाचं क्षतिग्रस्त गुलिखे सम्पदा व स्मारकत पुनःनिर्माणया झ्वलय् विवादय् लानाच्वंगु इलय् पुनःनिर्माण सिधःगु सम्पदा नं कच्चा जूगु खँ सीदुगु दु । भुखाचं दुनाः पुनःनिर्माण याःगु लिच्छविकालीन निगः देगः लछि मदुनिवं वा ज्वयेगु शुरु जूगु दु ।

ऐतिहासिक, पुरातात्विक, सांस्कृतिक व धार्मिक ल्याखं महत्वपूर्ण सक्वया शंखरापुर नगरपालिका वडा नं. ७ स्थित साल्खा त्वालय् च्वंगु राम झुपडी कृष्ण मन्दिर पुनःनिर्माण गुणस्तरीय मजूगु स्थानीयवासीतय् द्वपं दु । गुकिं यानाः देगःया सिँ लगायत मेमेगु संरचना भ्वाभः जुयाः जीर्ण जुइगु अवस्थाय् थ्यंगु दु ।

देगः पुनःनिर्माणया निंतिं पुरातत्व विभागं बोलपत्र आह्वान याःगु खः । देगः पुनःनिर्माण लगायत सूचना संलग्न यानाः निर्माणस्थलय् तयेमाःगु सूचना पाटी तकं मतसे देगः पुनःनिर्माण याःगुलिं गुणस्तरहीन जूगु खः । कानूनी व्यवस्थाकथं तयेमाःगु जानकारीमूलक तथ्य दुथ्याकातःगु सूचना पाटी मतःगुलिं स्थानीयवासीतय्सं थ्व सम्बन्धय् छुं नं जानकारी कायेमखंगु पूर्व गाविस अध्यक्ष गोविन्दप्रसाद श्रेष्ठं कनादिल ।

‘जानकारीमूलक बोर्ड तयामतःगुलिं गुलि लागतय् निर्माण जूगु तथ्य सीकेगुपाखें जिपिं बञ्चित जुल, ज्या गुणस्तरीय मजूगुलिं जिमिसं बजेट पनेत विभागया इन्जिनियरयात इनाप नं यानागु खः । जिउ, धकाः धाःसां नं निर्माण व्यवसायीयात ध्यबा बिउगु जुयाच्वन’, वय्कलं धयादिल । वा वइगु इलय् लः ज्वयाः देगः दुनेया सिँ दक्वं प्वःथाःगु थें फुले जुया वयाच्वंगु दु ।

देगः दुने ज्वःगु लः फयेत स्टिलया बाता तयातःगु दु । निर्माण व्यवसायीं देगःया लिच्छविकालीन काष्ठकलां जाःगु कलाकृति नं ज्वना वंगु स्थानीय योगेन्द्रलाल बःसिं कनादिल । ‘देगः छायेत तयातःगु पुरातात्विक महत्वया २२ गेजया जस्ता नं निर्माण व्यवसायीं ज्वना वन, रेलिङ, न, सिँ आदि लगायतया बुट्टा थेंज्याःगु सामग्री देगलं तनाच्वंगु दु, थ्व दक्वं सामग्री निर्माण व्यवसायीं हे ज्वा वंगु दु’ वय्कलं धयादिल ।

देगः पुनःनिर्माणया ठेक्का काःगु गुप्ति गणेश कन्स्ट्रक्सनया विकास श्रेष्ठं धाःसा वडाअध्यक्षं हे पुरातात्विक महत्वया सामग्री देगलय् तयातयेबलय् फोहर जुइगुलिं यंकेत धाःगु दावी यानादी । देगलय् लः ज्वइगु समस्या ज्यंकेत विभागया इन्जिनियरसहितया पुचः ज्वना वनेत्यनागु वय्कलं धयादीगु दु ।

निर्माण व्यवसायीं पुलांगु हलंज्वलं छ्यलाः चुकू तकं तये मिले मजुइकथं पुनःनिर्माण याःगु नगरपालिकाया धापू दु । ‘देगः दनेत ३ बाइ ४या पाता तयेमाःगु थासय् १ इन्चया पाता जक तःगु दु, थुकिं यानाः वा वइगु इलय् आपालं थासं लः ज्वयेगु यानाच्वंगु दु, पुनःनिर्माणया झ्वलय् विभागया इन्जिनियर पूर्णबहादुर श्रेष्ठ व निर्माण व्यवसायीयात तःक्वः तक्वः धाःसां उकियात भिंकेगु ज्या मजुल’ वय्कलं धयादिल ।

विभागया पुरातत्व अधिकृत सविता न्यौपानेयात नं पुनःनिर्माण गुणस्तरी मजूगुलिं बजेट वनेत तःक्वः तःक्वः जानकारी बियागु वडा ज्याकुथिं न्ह्यथंगु दु । विभागं निर्माण व्यवसायीयात दथुइ सिलिकन तयेके बियाः पूरा बजेट बिउगु खः । सिलिकन तःसां नं देगःया प्वालं प्वालं लः ज्वयेगु यानाच्वंगु दु ।

कन्स्ट्रक्सन कम्पनीं अप्वःथें दक्वं सामग्री पुलांगु हे छ्यलाः देगः पुनःनिर्माण याःगु खः । निर्माण व्यवसायीं १० गः थां जक न्हूगु प्रयोग याःगु स्थानीयवासीं धाःगु दु । देगः पुनःनिर्माणया निंतिं ३५ गू लाख तका दामं ठेक्का बियागु विभागया पुरातत्व अधिकृत न्यौपानें कनादिल ।
नगरपालिकाया वडा नं. ६ लय् च्वंगु नारायण द्यःया देगलं नं पुनःनिर्माण सिधयेवं लः ज्वयेगु यानाच्वंगु दु ।

पुरातत्व विभागया सम्पदा संरक्षण व संवद्र्धनया निंतिं ज्या याइगु विभागं बोलपत्र आह्वान यानाः दयेकूगु सम्पदास्थल लछितक नं कायम जुइ मफुगु अवस्थां शंका यायेमाःगु अवस्था दुगु स्थानीयवासीतय् धापू दु । नारायण द्यःया देगः पुनःनिर्माणया निंतिं नं ३५ गू लाख तकां हे मिलिजुलि कन्स्ट्रक्सनयात बोलपत्र बियागु विभागया पुरातत्व अधिकृत न्यौपानें कनादिल ।

निर्माणया जिम्मेवारी काःम्ह व्यवसायी राजेश श्रेष्ठं पल्लिं चिइ सःम्ह मिस्त्री मदुगुलिं नारायण द्यःया देगलय् पल्लिं चिइगु ज्या जुइ मफयाच्वंगु धयादी । दक्ष मिस्त्री दत धाःसा स्वघौया दुने ज्या सिधइगु वय्कःया दावी दु । राष्ट्रिय पुनःनिर्माण प्राधिकरणया पुरातत्व अधिकृत भीष्म बाँस्कोटां भुखाय् प्रतिरोधी व गुणस्तरीय संरचना दयेकेमाःगु धयादी ।

भुखाचं दुंगु १८५ पुरातात्विक सम्पदा निर्माण जुइधुंकाः लः ज्वःगु धकाः समस्या वःगु धाःसा थ्व हे न्हापांगु जूगु प्राधिकरणं न्ह्थंगु दु । थज्याःगु समस्या आपालं वल धाःसा सुधारया निंतिं नीति निर्माण यायेगु अधिकृत बास्कोटाया धापू दु । भुखाचं क्षतिग्रस्त ७५३ सम्पदा पुनःनिर्माण जुइमाःगु थासय् ५०० स्वयां अप्वः ज्या जुइ फयाच्वंगु मदुनि ।