विदेश वनीपिं मिस्त नं अप्वल

येँ – वैदेशिक रोजगारीया लागिं विदेश वनीपिं मिजंतय् ल्याः धमाधम घटे जुयाच्वंसां विदेश वनीपिं मिसातय् ल्याः धाःसा अप्वया वयाच्वंगु खनेदुगु दु । विदेशय् ज्या याः वनीपिं मिजंतय् ल्याः कम जुयाः देय्या अर्थतन्त्रय् हे लिच्वः लानाच्वन धकाः खँ पिहां वयाच्वंगु इलय् मिसातय् ल्याः धाःसा अप्वयाच्वंगु खनेदुगु खः । थ्व आर्थिक दँय् विदेश वनीपिं मिसातय् ल्याः न्हापाया तुलनाय् ९ प्रतिशतं अप्वःगु तथ्यांक पिहां वःगु दु ।

सामान्यतया विदेश वनीपिं मिजंतय् ल्याः ९४ प्रतिशत दःसा मिसातय् ल्याः ६ प्रतिशत तक दइगु जुयाच्वंगु खः । तर आः धाःसा थ्व ल्याखय् छुं भचा हिउपाः वइगु संकेत वःगु दु । विदेशय् ज्या याः वनीपिं नेपाःया मिसातय्त श्रम शोषण जक मखु यौन शोषण समेत अप्वः जूगु समाचारत यक्व पिहां वयेवं नेपाः सरकारं नेपाःया मिस्तय्त विदेश वनेगुपाखें पना तःगु खः । तर अथे खःसां नेपाःया मिस्त विदेश वनेगु कम धाःसा मजू ।

विदेश वनाच्वंपिं अप्वः धइथें मिस्त भारतया लँपु जुयाः अवैध रुपं वनेगु यानाच्वंगु दु । थथे यानाः वनीबलय् उपिं झन् हे जोखिमय् लाःगुलिं सरकारं मिस्त नं विदेश वनेगु नीतिइ छुं भचा खुलापन हःगु खः । उकिं न्हापा अवैध रुपं विदेश वनीपिं मिस्त नं आः वैध लँपुइ दुहां वःगुलिं उमिगु ल्याः अप्वः खने दुगु खयेमाः धकाः नं अनुमान याःगु दु ।

अथे खःसां थौंकन्हय् मिस्त नं थः आत्मनिर्भर जुइमाः धइगु चेतना जागृत जुया वःगु कारणं उपिं नं मिजंत थें हे विदेश वनेगु क्रम अप्वया वःगु खँ नं धाःगु दु । विदेशय् ज्या याः वनीपिं मिस्त मध्ये पहाडी मिस्तय् ल्याः धाःसा अप्वः दु । तराई लागाया मिस्त कम जक विदेश वंगु खनेदु । नेपाःया मिस्त दुबई, मलेशिया आदि देशय् छेँज्या यायेत वनाच्वंगु खनेदु ।

सम्बन्धित बुखँ

LEAVE YOUR COMMENTS