ने. सं. ११४४ ञलाथ्व दशमी -

जबरायात महाभियोग तयेत माग यासें सभामुखयात ज्ञापन

येँ -प्रधानन्यायाधीश चोलेन्द्र शम्शेर जबरायात महाअभियोग तयेमाःगु माग यासें नेपाल बार एसोसिएसनं म्हिगः सभामुख अग्नीप्रसाद सापकोटायात ज्ञापनपौ बिउगु दु । बारया अध्यक्ष चण्डेश्वर श्रेष्ठया नेतृत्वय् वंगु पुचलं सभामुख सापकोटायात ज्ञापनपौ बिउगु खः ।

आःया प्रधानन्यायाधीश जबराया कारणं यानाः न्यायपालिकां विश्वास तंकेमाःगु अवस्था वःगु व अदालतय् विसंगति ब्वलंगु धासें नेपाल बारं आन्दोलन याना वयाच्वंगु खः । म्हिगः सभामुखयात लःल्हाःगु ज्ञापन पतिइ प्रधानन्यायाधीशयात चीकेमाःगु आधार, कारण व द्वपं नं न्ह्यथनातःगु दु । लिसलय् सभामुख सापकोटां सर्वोच्च अदालतया विषय आःया नितिं तःधंगु विषय जूगुलिं न्यायालयया बारे थम्हं सीकेगु कुतः यानाच्वनागु खँ कनादीगु खः ।

उकथं हे नेपाल बारं सत्तारुढ गठबन्धन दुथ्याःगु जनता समाजवादी पार्टीया संघीय परिषद अध्यक्ष डा. बाबुराम भट्टराई व कार्यकारिणी परिषदया अध्यक्ष उपेन्द्र यादवपिंत नं ज्ञापनपौ बिउगु दु । ज्ञापनपौ कासें अध्यक्ष डा. भट्टराईं न्यायालयय् खनेदुगु समस्या व नेपाल बार एसोसिएसनया आन्दोलनया विषयस गठबन्धनं मंकाः धारणा दयेकाः निकास मालेमाःगु खँ धयादिल ।

बारया पदाधिकारीपिंलिसे खँ ल्हायेगु झ्वलय् डा. भट्टराईं धयादिल, ‘छिकपिसं ल्ह्वंगु सःयात सम्मान याना, फयांफछि राज्यया अंगं थःगु समस्या थम्हं ज्यंकेमाः धइगु खः, गठबन्धनय् मंकाः धारणा दयेकेमाः, जिमिगु धापू संरचनागत सुधार जुइमाः धइगु खः, थ्व खँ गठबन्धनय् तयेगु जुइ, राजनीतिक दलया भूमिका दयेमाः धइगु खँय् कुतः यायेगु जुइ ।’ उकथं हे डा. भट्टराईं न्यायालयय् खनेदुगु समस्या संरचनात्मक समस्या खः धासें अंशय् मखुसें मूल समस्या गन दु धकाः स्वयेमाःगु खँ नं धयादीगु दु ।

उकथं हे म्हिगः बारं राष्ट्रियसभाया अध्यक्ष गणेशप्रसाद तिमिल्सिना, एमाले संसदीय दलया उपनेता सुवास नेम्वाङ, माओवादी केन्द्रया प्रमुख सचेतक देव गुरुङ लिसे थीथी दलया प्रतिनिधियात नापलानाः महाअभियोग तयेमाःगु माग यासें ज्ञापन पौ बिउगु खः ।

थ्वहे झ्वलय् प्रधानन्यायाधीश जबराया राजीनामा माग यासें आन्दोलन यानाच्वंगु नेपाल बारं म्हिगः नं थःपिनिगु धर्ना ज्याझ्वःयात निरन्तरता बिउगु दु । धर्ना ज्याझ्वलय् सम्बोधन यायेगु झ्वलय् बार अध्यक्ष श्रेष्ठं प्रधानन्यायाधीशं घुस नःगु प्रमाण दुसा उकिया जानकारी बारयात बीत इनाप यानादीगु दु ।