ख्वनाय् मशाल जुलुस

येँ (नेपालभाषा टाइम्स) – फास्ट ट्रयाकया विरोधय् ख्वनाय् थौं तःधंगु मशाल जुलुस पिदंगु दु । फास्ट ट्य्राक दयेकेगु निंतिं सरकारं अधिग्रहण यानातःगु जग्गाय् थौं वाः पी धुंकाः बहनी मशाल जुलुस पिथँगु खः । जुलुसय् सलंसः मनूतय् उपस्थिति दुगु खः ।

ख्वनामितय्त विस्थापित याइकथं हःगु फास्ट ट्य्राकया विरोधय् ख्वनामितय्सं ताःई न्ह्यव निसें संघर्ष याना वयाच्वंगु दु । थ्व हे संघर्षया झ्वलय् सरकारं फास्ट ट्य्राकया जिरो किलो (सुरुवात विन्दु) दयेकेगु धकाः अधिग्रहण यानातःगु जग्गाय् ख्वनामिपिंसं मंकाः ज्या यानाः वा पिउगु खः । प्रहरीं वा पी दइमखु धकाः पंवःसां प्रहरी लिसे ल्वानाः हे थौं थन १३ रोपनी जग्गाय् वा पिउगु दुसा वा पिइगु ज्या निरन्तर न्ह्याइगु खोकना जनसरोकार समितिं धाःगु दु ।

वा पीगु ज्या सिधयेकाः अनशनया ज्याझ्वः नं न्ह्याकेगु तयारी जुयाच्वंगु दु । अथेहे आः स्वनिगःया त्वाःत्वालय् वनाः फास्ट ट्रय्राकं लाकीगु नकारात्मक लिच्वःयात कयाः प्रचार यायेगु तयारी नं जुयाच्वंगु दु ।