प्रधानमन्त्री व गृहमन्त्रीया नैतिकता व सेना परिचालनय् न्ह्यसः
येँ (नेपालभाषा टाइम्स) – सुनसरीया देवानगञ्ज गाउँपालिका ३ य् लाःगु कप्तानगञ्जय् जूगु दंगाया झ्वलय् प्रहरीं गोली कयेकूगु घटना लिपा सेना परिचालन जूगुयात कयाः न्ह्यसः थंगु दु । विशेषतः भदौ २३ व २४ गते जूगु जेनजी आन्दोलनलिसे स्वानाः थ्व न्ह्यसः थंगु खः ।
कप्तानगञ्जय् जूगु घटनाय् प्रहरीं सामान्य विवादय् हे गोली कयेकूगु खनेदु । प्रहरीया गोली लानाः छम्हेसिया ज्यान वंगु दुसा च्याम्ह घाःपाः जूगु दु । प्रहरीं गोली कयेकूगु घटनाय् प्रधानमन्त्री व गृहमन्त्रीं नैतिक जिम्मेवारी काइ लाकि काइमखु धइगु मू न्ह्यसः जुयाच्वंगु दु ।
भदौ २३ व २४ गते संसद भवनय् जूगु आक्रमणया झ्वलय् प्रहरीं कयेकूगु गोलीं लानाः तःम्ह मनूत सीगु खः । उबलय् प्रहरीं गोली कयेकूगुलिइ प्रधानमन्त्रीं नैतिक जिम्मेवारी कायेमाः धासें तत्कालीन प्रधानमन्त्री केपी ओलीया राजीनामा फ्वनाः २४ गते देय्न्यंकं मिं तयेगु ज्या याःगु खः ।
प्रधानमन्त्रीया राजीनामा माग यानाः जूगु प्रदर्शनया झ्वलय् थाय्थासय् मि तयेगु ज्याय् वर्तमान गृहमन्त्री सुधन गुरुङं हे नेतृत्व याःगु खः । उबलय् येँ महानगरपालिकाया मेयर जुयाच्वंम्ह वर्तमान प्रधानमन्त्री बालेन शाहं नं भीड नियन्त्रणया झ्वलय् प्रहरीं गोली कयेकूगु घटनाया नैतिक जिम्मेवारी प्रधानमन्त्री व गृहमन्त्रीं कायेमाः धाःगु खः । उबलय् प्रहरीं गोली कयेकूगु घटनाय् तत्कालीन प्रधानमन्त्री ओली व गृहमन्त्री लेखकयात छानविन आयोगं नं जघन्य अपराध याःगु द्वपं बियाः कारवाहीया सिफारिस याःगु खः । कार्की आयोगं भीड नियन्त्रणय् सुरक्षा संगठनं बल छ्यल धाःसा उकिया नैतिक जिम्मेवारी प्रधानमन्त्री व गृहमन्त्रीया नं जुइगु ब्याख्या याःगु खः ।
आः छगू सामान्य विवादया घटनाय् प्रहरीं गोली कयेकेगु ज्या जूगु दु । प्रहरीया गोलीं लानाः सर्वसाधारण मनूत सीगु दु, घाःपाः जूगु दु । कार्की आयोगया हे प्रतिवेदनया ल्याखं स्वयेगु खःसा नं थ्व घटनाय् प्रधानमन्त्री व गृहमन्त्रीया जिम्मेवार जुइगु खनेदु । उकिं घटनायात कयाः प्रधानमन्त्री व गृहमन्त्रीं नैतिक जिम्मेवारी कयाः राजीनामा बीम्वाः ला धइगु न्ह्यसः थनेगु यानाहःगु खः ।
अथेहे कप्तानगञ्जया घटना लिपा जिल्ला सुरक्षा समितिया निर्णयं सेना हतियारसहित सतकय् कुहां वयेधुंकूगु दु । सेना कुहां वःगु खँय् नं भदौ २३ व २४ या घटनालिसे हे स्वानाः सेना थुकथं छक्वलं कुहां वये जिउ कि मजिउ धइगु न्ह्यसः थंगु खः । भदौ २३ व २४ गते प्रदर्शनकारीतय्सं देय्न्यंकं विध्वंश न्यंकाच्वंगु इलय् सेना थ्यंमथ्यं २४ घन्टा निष्क्रिय च्वनाबिउगु खः । गुकिं यानाः यक्व हे भौतिक क्षति जूगु खः । उबलय् संकटकाल वा राष्ट्रिय सुरक्षा परिषदया निर्णय व राष्ट्रपतिं अनुमोदन मजुइकं सेना कुहां वयेमजिउ धकाः सेना सुम्क च्वनाबिउगु खः । तर थ्व पालय् धाःसा जिल्ला सुरक्षा समितिया निर्णय लिपा हे सेना सतकय् वःगु दु । भदौ २३ गते नं येँ जिल्ला सुरक्षा समितिं अवस्था नियन्त्रणं पिने वनेधुंकूगुलिं सेनाया ग्वाहालि कायेगु औपचारिक निर्णय याःगु खः । तर संसद भवन निसें सिंहदरबार तक च्याकेधुंकाः नं सेना सुम्क हे च्वनाः भदौ २४ गते बहनी १० बजे जक परिचालित जूगु खः ।
अपाय्धंगु घटना जूबलय् तकं संकटकालया घोषणा मजूगु, राष्ट्रिय सुरक्षा परिषदं सेना परिचालनया निर्णय मयाःगु तर आः जिल्ला सुरक्षा समितिया निर्णयं हे सेना परिचालन जूगु खँ उबलय् सेनां सीक चायेकं नियोजित रुपं हे परिचालित मजूगु खः ला धकाः न्ह्यसः थनाहःगु खः ।
LEAVE YOUR COMMENTS