‘वार्ता न्ह्यः माग पूवंके फइ मखु’

येँ – नेत्रविक्रम चन्द ‘विप्लव’ पुचलं न्ह्यःने तःगु माग वार्ता न्ह्यः पूवंके मफइगु खँ सञ्चारमन्त्री लिसें सरकारया प्रवक्ता गोकुल बास्कोटां कनादीगु दु । मन्त्रिपरिषदया बैठक बारे जानकारी बीत म्हिगः याःगु पत्रकार सम्मेलनय् न्ववासें वय्कलं थ्व खँ धयादीगु खः । वय्कलं कमजोर धरातलय् च्वनाः वार्ता याये मफइगु खँ नं धयादीगु दु ।

मन्त्री बास्केटां धयादिल, ‘सरकारं ग्वःकः धायेगु ? वय्कःपिंलिसे जिपिं वार्ता यायेत तयार दु धकाः, तर वार्ता दाउपेच व शक्ति सञ्चयया निंतिं जक धाःसा जुइ मखु । विप्लवया कार्यकर्ता त्वःतेगु, मुद्दा लित कायेगु ज्या यायेधुंकाः वयां लिपा उपिं वार्ताय् मवल धाःसा छु यायेगु ?’

मन्त्री बास्कोटां विप्लव पुचः हिंसा यायेगु त्वःताः संविधान पालना यायेगु कथं वार्ताय् वल धाःसा वार्ता जुइ फइ, नत्र वार्ताया नामय् वार्ता जुइगु सम्भावना मदुगु खँ नं स्पष्ट यानादिल । वय्कलं धयादिल, ‘सीके राउत गुकथं वार्ताय् वःगु खः अथे हे वार्ताय् वःसा जक वार्ता जुइ फइ ।’ विप्लव पुचलं वार्ताय् वये न्ह्यः पूवंके माःगु धकाः स्वंगू मागत न्ह्यःने खः ।