चेल्सी किपर थिबाउट हाकनं रियल वनीगु चर्चा

लन्दन – चेल्सीया गोलकिपर थिबाउट कोर्टोइस सोमबार निसें शुरु जूगु प्रशिक्षणय् सहभागी मजुइवं हाकनं छकः रियल म्याड्रिड वनेगु चर्चा जूगु दु । थिबाउटयात थःगु क्लबय् हयेत रियलं कुतः यानाच्वंगु खः । बेल्जियमया २६ दँ दुम्ह गोलरक्षक थिबाउट गबलेनिसें चेल्सीया प्रशिक्षण वइ धइगु खँय् क्लबं छुं स्पष्ट याःगु मदु ।

सन् २०११ निसें थिबाउट चेल्सीं म्हिता वयाच्वंगु खः। चेल्सीया लागि थिबाउटं १५४ गू कासा म्हिते धुंकूगु दु। थिबाउट नकतिनि जक रसिया क्वचाःगु विश्वकपया उत्कृष्ट गोलरक्षक जुइत सफल जूगु खः । मेखे चेल्सीया मेम्ह प्रभावशाली कासामि इडेन हजार्ड नं रियल वनेगु चर्चा जुयाच्वंगु खः, तर हजार्ड प्रशिक्षण वयेधुंकूगु दु ।इंग्लिश प्रिमियर लिगया शीर्ष डिभिजनया कासा वइगु वालंनिसें शुरु जू वनाच्वंगु दु ।