चेल्सीं न्यूक्यासलयात बुकल, रियल शीर्षय्

लन्दन – इंग्लिस प्रिमियर लिगय् चेल्सीं न्यूक्यासल युनाइटेडयात बुकल । चेल्सीं न्युक्यासलयात २—१ गोलं बुकूगु खः। कासाया निगूगु हाफया ७६ औं मिनेटय् चेल्सीं पेनाल्टीपाखें अग्रता काःगु खः। चेल्सीया स्टार कासामि इडेन हर्जाडं पेनाल्टीयात सदुपयोग यासें कासाय् अग्रता बिउगु खः ।

चेल्सीया थ्व अग्रता धाःसा ताःईतक कायम जुइमफुत । कासाया ८३ औं मिनेटय् जोसेलुं न्युक्यासलया निंतिं बराबरी गोल याःगु खः । तर कासायागु अन्तिम इलय् डिआन्द्रें आत्मघाती गोल यायेवं चेल्सीं ३ अंक कायेत सफल जुल । थुगु विजयलिसें चेल्सी लिग तालिकाय् निगूगु थासय् थहां वंगु दु । दु ।

समान अंकं दुगु लिभरपुल गोल अन्तरं लिग तालिकाया शीर्षस्थानय् लानाच्वंगु दु । उखे स्पेनिस ला लिगाय् रियल म्याड्रिडं जिरोनायात ४—१ गोलं बुकल । कासाय् अग्रता धाःसा जिरोनां काःगु खः । वयागु निंतिं कासाया १६ औं मिनेटय् बोर्जा गर्सियां गोल यानाः टिमयात अग्रता बिउगु खः ।

तर न्हापांगु हाफया ३९ औं मिनेटय् सर्जियो रामोसं पेनाल्टीपाखें गोल यानाः टिमयात बराबरीइ हःगु खः । निगुगू हाफय् रियलया निंतिं करिम बेन्जिमां पेनाल्टीपाखें गोल यानाः टिमयात अग्रता बिउगु खः ।

वयां लिपा निगूगु हाफया ५९ औं मिनेटय्् ग्यारेथ बेलं छगू गोल यायेवं रियलं ३—१या अग्रता काःगु खःसा बेन्जिमां हे ८० औं मिनेटय् व्यक्तिगत निगुगू गोल यानाः रियल विजय सहज याना बिउगु खः । विजय लिपा रियल म्याड्रिड ला लिगाया शीर्ष स्थानय् दु ।