रामोसं हाकनं क्लोपया आलोचना यात

रियल म्याड्रिडया कप्तान सर्जियो रामोसं लिभरपुलया प्रशिक्षक जर्गेन क्लोपया हानं आलोचना याःगु दु । लिभरपुल व रियल म्याड्रिड दथुइ जूगु च्यापियन्सं लिगया फाइनल लिपा रामोस व क्लोप दथुइ वं वयात वं वयात आलोचना यायेगु चर्को जुया वनाच्वंगु दु ।

च्यापियन्स लिगया फाइनलय् रामोसं याःगु ट्याकलं यानाः इजिप्टया स्ट्राइकर मोहम्मद सलाहया ब्वहलय् चोट लाःगु खः । थ्व चोटया कारणं सलाहं दथुइ हे कासा त्वःते माल । सलाहं थ्व हे चोटया कारणं विश्वकपया न्हापागुं कासा नं म्हिते मखंगु खः । रामोसया ट्याकलयात क्लोपं हिंस्रक जूगु द्वपं बिउगु खः ।

थ्व लिपा थुपिं निम्हेसिया दथुइ चर्काचर्की जुया वयाच्वंगु दु । एथलेटिको म्याड्रिडनाप जुइत्यंगु युइएफए सुपर कप न्ह्यः पत्रकार सम्मेलनय् न्ववासें रामोसं क्लोप थःत गलत आरोप बिउगु व थःम्हं सुं नं कासामियात चोट लाकेगु बिचाः तकं मयाना धाःगु खः । थ्व झ्वलय् रामोसं थःपिंसं यानागु उत्कृष्ट प्रर्दशनयात क्लोपं स्वीकार यायेमफुगु धासें आलोचना याःगु खः ।

रामोसं क्लोपयात थःगु क्लबया कासामितय् बिचाः यायेत नं सुझाव बिउगु दु । रामोसं धाःगु दु ‘फाइनलय् लिभरपुल बूगुलिं क्लोपं थज्याःगुु आरोप बिउगु ख, अले क्लोप न्हापांखुसी फाइनलय् बूगु नं मखु ।’ च्याम्पियनसीपय् रियल म्याड्रिडं लिभरपुलयात ३–१ गोलं बुकूगु खः।

मेनेजरया रुपय् क्लोप फाइनलय् बूगु थ्व खुक्वगुखुुुसी खः । रामोसं उत्कष्ृृट मेनेजरया मतदानय् थःपिंसं क्लोपयात हे मत बियागुलिं धुक्क जुइत नं धाःगु दु ।