श्री हल्चोक आकाश भैरवनाथ समितिया हना

येँ – श्री हल्चोक आकाश भैरवनाथ समन्वय समितिपाखें स्वंगू दशक न्ह्यवंनिसें गुथिया नायः जुयाः ज्या न्ह्याका वयाच्वनादीम्ह माइला पुतुवारयात छगू ज्याझ्वःया दथुइ हंगु दु । पुतुवार हल्चोक आकाश भैरव गुथिइ स्वंगू दशक तक नायः जुयाः जात्रा सुथां लाक्क न्ह्याकेत वय्कलं बियादीगु योगदानया कदरयासें समितिं झिद्वः तका दांलिसें हनापौ देछानाः हनेज्या याःगु खः ।

वय्कःयात हल्चोक आकाश भैरव द्यःया छगू दशक न्ह्यवंनिसें पुजारी जुयाच्वनादीम्ह थकुवा पुतुवार, नरबहादर पुतुवार समन्वय समितिया सल्लाहकार शरदकुमार डंगोल, रविकृष्ण श्रेष्ठ व समितिया नायः सागर पुतुवारं दोसल्लां न्ह्ययेकाः हनापौ व दां ल्ःल्हानाः सम्मान यानादीगु खः ।

समितिया नायः सागर पुतुवारया सभापतित्वय् जूगु ज्याझ्वलय् दुजः विश्व शाक्यं लसकुस यानादीगु खः । समितिया न्वकु सुरज पुतुवार, पुरुषोत्तम महर्जन, सम्मानित व्यक्तित्व व समितिया सल्लाहकारं थःथःगु नुगःखँ तयादीगु ज्याझ्वलय् समितिया दांभरिं नृपेन्द्रलाल श्रेष्ठं हनाज्याझ्वःया बारे जानकारी बियादीगु खः ।