बीआरआई बारे चीनया चिउताः

येँ (नेपालभाषा टाइम्स)-चीन सरकारं बीआरआई कार्यान्वयनया विषययात कयाः चिउताः प्वंकूगु खँ उपप्रधान लिसे गृहमन्त्री नारायणकाजी श्रेष्ठं धयादीगु दु । न्यान्हुयंकंया चीन भ्रमण यानाः लिहां झायेगु झ्वलय् म्हिगः येँया अन्तर्राष्ट्रिय विमानस्थलय् पत्रकारतलिसे खँ ल्हायेगु झ्वलय् वय्कलं उगु खँ धयादीगु खः । वय्कलं नेपाल सरकारं बीआरआई २०७० सं सम्झौता याःगुलिं उकियात कार्यान्वयन यायेगु निंतिं मोडालिटी दयेकाः कार्यान्वयन यायेगु खँ नं धयादीगु दु ।

थःगु भ्रमणया झ्वलय् थः व चीनया उपप्रधानमन्त्री ह लि फङ दथुइ निगू पक्षीय नापलायेगु ज्या जूगु धासें निगू देय् दथुइ विकास, व्यापार व लगानीया सम्भावनाया विषयय् सकारात्मक सहलह जूगु खँ नं वय्कलं धयादीगु दु । वय्कलं भ्रमणया झ्वलय् सिचुवान एयरलाइन्सया पदाधिकारीतलिसे सहलह यानाः छेन्दु–येँ रुटय् हवाई उडान अप्वयेकेत व छेन्दुं पोखरा व भैरहवा विमानस्थलय् कमर्सियल उडान शुरु यायेत इनाप यानागु खँ नं कनादिल ।