चोभारया सुख्खा बन्दरगाहया गुनासो दर्ता मखु, आन्दोलन

येँ – चोभारय् दयेकेत्यंगु सुख्खा बन्दरगाहपाखें पीडित स्थानीय वासिन्दायात छुं गुनासो दुसा न्हय्न्हुया दुने पेश यायेत सरकारं ई बिउगु दु । तर चोभार संरक्षण समितिं धाःसा थुकियात सरकारं यानाच्वंगु षडयन्त्र धासें उकिया विरोध याःगु दु । संघर्ष समितिया संयोजक पञ्चलाल महर्जनं ‘नेपालभाषा टाइम्स’ लिसें खँ ल्हासें सरकारं षडयन्त्र यानाच्वंगु दुसा उकिया विरुद्ध थःपिंसं चरणवद्ध आन्दोलन यानाच्वनागु खँ कनादिल ।

सोमवाः छगू सार्वजनिक सुचं जारी यासें स्थानीय वासिन्दायात न्हय्न्हुया दुने स्वापू तयेत उद्योग वाणिज्य तथा आपूर्ति मन्त्रालयं इनाप याःगु दुसा मन्त्रालय अन्तर्गतया नेपाल इन्टरमोडल यातायात विकास समितिं चोभारया स्थानीय वासिन्दाया गुनासो संबोधन यायेत वार्ता समिति समेत गठन यानागु जानकारी नं बिउगु खः ।

समितिं न्हय्न्हुया दुने दुहां वइगु गुनासोया आधारय् सहलह यानाः वार्ता समितिं माग संबोधन यायेगु खँ धाःगु दु । तर स्थानीय जनतां धाःसा थ्व वार्ता समितिं थःपिनिगु माग पूवंके फइ मखु धासें थःपिनिगु चरणवद्ध आन्दोलन न्ह्याना हे च्वनीगु खँ धाःगु दु । लिसें सरकारं सुचं वःसां अन गुनासो धाःसा दर्ता याः मवनेगु खँ नं धाःगु दु ।

स्थानीय वासिन्दां चोभाः छगू ऐतिहासिक, धार्मिक व पर्यटकीय लागा जूगुलिं अन सुख्खा बन्दरगाह दयेके मजिउ धइगु माग याना वयाच्वंगु दु ।
संरक्षण समितिया अध्यक्ष महर्जनं बियादीगु जानकारी कथं आन्दोलनया न्हापांगु चरण कथं स्थानीय वासिन्दायात जागरुक यायेगु लिसें मेगु थीथी ज्या जुयाच्वंगु दु । वय्कलं चरणबद्ध आन्दोलन लिपा देय्न्यंकंया सांसदतय्त ज्ञापन पौ बीगु व वयां लिपा नं सरकारं थःपिनिगु माग संबोधन मयात धाःसा तःजिक आन्दोलन
यायेगु तयारी जुयाच्वंगु जानकारी नं बियादीगु दु ।