मनसुन निष्क्रिय, दोधारा चाँदनीय दकलय् अप्वः वा

येँ (नेपालभाषा टाइम्स)- जल तथा मौसम विज्ञान विभागं सोमवाः निसें मनसुन बुलुहुं निष्क्रिय जुयावंगु खँ धाःगु दु । विभागं मनसुन निष्क्रिय जूगुलिं वा वइगु नं म्हो जुयावंगु खँ धाःगु दु । विभागया न्यूनचापीय रेखा बुलुहुं दक्षिणपाखे न्ह्याः वंगुलिं मनसुनया सक्रियता म्हो जुयाः वा वइगु म्हो जुयावंगु खः ।

विभागया मौसम पूर्वानुमान महाशाखाया मौसमविद् सरोज पुडासैनीं आइतवाः तक न्यूनचापीय रेखा उत्तरपाखे लानाच्वंगुलिं तसकं वा वयाच्वंगु व सोमवाः निसें उगु रेखा दक्षिणपाखे न्ह्याः वंगुलिं मनसुनया सक्रियता नं म्हो जुयावंगु खँ धयादीगु दु ।

वा वइगु म्हो जूसां मधेस, बागमति, लुम्बिनी, कर्णाली व सुदूरपश्चिमय् अझ नं छुं न्हि हल्का निसें मध्यम कथं वा वयेफुगु धाःगु दु । जल तथा मौसम विज्ञान विभागं दोधारा चाँदनीइ आःतकया दकलय् अप्वः वा वःगु मापन याःगु दु । दोधारा चाँदी आइतवाः व सोमवाः २४ घन्टाया दुने ५७३ मिलमिटर वा वःगु खँ धाःगु दु । थ्व नेपालय् आःतक मापन जूगु मध्ये दकलय् अप्वः खः ।

विभागया अत्तरियास्थित महाकाली बेसिन फिल्ड कार्यालया प्रमुख सञ्जय साहं दोधारा चाँदनीइ थुलिमछि वा वःगु नेपाःया इतिहासय् हे न्हापांखुसी जूगु खँ धाःगु दु ।