वक्तृत्वकला कासा क्वचाल
ख्वप(नेपालभाषा टाइम्स)- मैत्रेय युवा संघया ग्वसालय् वक्तृत्वकला धेंधेंबल्लाः कासा क्वचाःगु दु । संघया ग्वसालय् भगवान बुद्धं बोधिसत्व लाभ यानाः दकलय् न्हापां उपदेश बियाबिज्याःगु दिंया लुमन्तिइ उगु वक्तृत्वकला कासा ग्वसाः ग्वःगु खः । भगवान बुद्धं दकलय् न्हापां सारनाथय् उपदेश बियाबिज्याःगु २६१३ दँ क्यंगु दिंयात लुमंकाः ग्वसाः ग्वःगु वक्तृत्वकला कासा मैत्रेय केन्द्रया ब्वनामिपिनि दथुइ जूगु खः । ज्याझ्वलय् केन्द्रया गुम्ह ब्वनामिपिंसं थःथःगु कला न्ह्यब्वयादीगु खः ।
संघया नायः तीर्थराज वज्राचार्यया सभापतित्वय् श्रद्धेय अर्जुन भन्ते (भिक्षु गरुको) मूपाहांकथं बिज्याःगु खः । पंचशील ग्रहण यासें न्ह्याःगु समापन ज्याझ्वलय् सचिव संचित बुद्धाचार्यं लसकुस यानादीगु खः । विजयी कासामिपिंत मूपाहां अर्जुन भन्तें दसिपौ व सिरपाः लःल्हाना बिज्याःगु खः ।
वत्तृmत्वकलाय् लूनिभाः चित्रकार न्हाप, भिंतुना शाक्य लिउ व प्रेमस शिल्पकार लियांलिउ लाःगु खः । कासाय् निर्णायककथं लक्ष्मीचन्द्र वज्राचार्य व गंगा गोसाइँ च्वनादीगु खः । उगु कासाया निंतिं दाता हेमराज वज्राचार्यं आर्थिक ग्वाहालि यानादीगु खः ।
उगु हे ज्याझ्वलय् बौद्ध समकृत विहार (थेरवाद भवन) निर्माणया निंतिं संघपाखें २६,५००/— तका दां नं लःल्हाःगु खः ।
LEAVE YOUR COMMENTS