ने. सं. ११४६ दिल्लागा तृतीया -

सुनसरीया घटना मेमेगु जिल्ला न्यनावन

सिरहालय् छम्ह सित : लहान, जनकपुर, गोलबजारय् म्हिगःनिसें कर्फयु

येँ (नेपालभाषा टाइम्स) – सुनसरीया देवानगञ्जय् जूगु दंगा मधेस प्रदेशया मेमेगु जिल्लाय् नं न्यना वंगु दु । थ्व झ्वलय् म्हिगः जनकपुरय् जूगु झडपय् लानाः छम्हेसिया ज्यान वंगु दुसा लहान, धनुषा, सिरहा जिल्लाया थीथी थासय् प्रशासनं कर्फ्यु आदेश जारी याःगु दु ।

सुनसरीइ जूगु घटनाया विरोधय् म्हिगः सिरहाया गोलबजारय् निगू समूहया ल्याय्म्हत प्रदर्शनय् कुहां वःगु खः । थ्व प्रदर्शनया झ्वलय् निगू पुचः दथुइ ल्वापु जुइवं थन नं प्रहरीं गोली कयेकूगु खः । प्रहरीया गोलीं लानाः अन्दाजी १९ दँया गणेश यादव सीगु दुसा मेम्ह छम्ह घाःपाः जूगु दु ।

घाःपाः जूम्ह ल्याय्म्ह विकास ठाकुरयात सेनाया हेलिकप्टरय् तयाः उपचारया निंतिं यंकूगु दु । वयागु अवस्था नं गम्भीर दुगु खँ धाःगु दु । जिल्ला प्रशासन कार्यालय सिरहाया सहायक प्रमुख जिल्ला अधिकारी चेतराज बरालं यादव सीगु पुष्टि यानादीगु दु । यादवया सीगु खबर न्यनावनेवं प्रदर्शन झन तच्वया वंगु खः । थन प्रदर्शनकारीतय्सं म्हिगः न्हिनय् तकया दुने झिंनिगः मोटरसाइकल च्याकाबिउगु दु । अथेहे गोलबजारय् च्वंगु एबी मल च्याकाबिउगु दु ।

ल्वापु तच्वः जुया वयेवं स्थानीय प्रशासनं गोलबजार क्षेत्रय् कफ्र्यु तःगु खः । कर्फ्यु जारी जूसां प्रदर्शन झन उग्र जुयावयेवं स्थानीय प्रशासनं थन सेनायात सतकय् क्वत हयेधुंकूगु दु । अथेहे झडप न्यनावनेवं जिल्ला प्रशासन कार्यालय सिरहां लहान नं कर्फ्यु आदेश जारी याःगु खः ।

सुनसरी घटनायात कयाः धनुषा जिल्लाया जनकपुरय् नं प्रदर्शन जूगु दु । थनं निगू पक्षया दथुइ ल्वापु तच्वया वयेवं जिल्ला प्रशासन कार्यालय धनुषां जनकपुर उपमहानगरपालिका, लक्ष्मीनिया गाउँपालिका, नगराइन नगरपालिका क्षेत्रय् न्हिनय् ३ बजे निसें कर्फ्यु तःगु दु ।

मेखे सुनसरीइ जूगु घटनाय् घाःपाः जूम्ह मेम्ह छम्ह नं म्हिगः अस्पतालय् वासः याकुयाकुं मंत । वंगु आइतवाः जूगु झडपया इलय् प्रहरीं कयेकू गोली लाःम्ह २२ दँया जयप्रकाश मेहता म्हिगः मदुगु खः । मोरङ्ग प्रहरीया सूचना अधिकारी डिएसपी मकेन्द्रकुमार मिश्रं प्वाथय् गोली लाम्ह मेहता विराटनगरया न्युरो अस्पतालय् उपचार याकुयाकुं मदुगु खँ धाःगु दु ।

प्रहरीया गोलीं लानाः आइतवाः हे छम्हेसिया ज्यान वनेधुंकूगु दु । गोली लाःपिं मेपिं च्याम्हेसित विराटनगरया थीथी अस्पतालय् वासः याकातःगु दु । उपिं मध्ये झिंच्यादँया अमित यादवया अवस्था गम्भीर दुगु खँ धाःगु दु ।