तलेजुया तिसाः लितहयेत कार्यवाहक प्रमुख डंगोलया पहल

येँ (नेपालभाषा टाइम्स) – येँ महानगरपालिकाया कार्यवाहक प्रमुख सुनिता डंगोलं तलेजु भवानीया खुयायंकूगु तिसाः लितहयेगु निंतिं कुतनीतिक पहल न्ह्याकादीगु दु । बुधवाः अमेरिकाया कार्यवाहक राजदूत स्कट उर्बमयात नापलासें कार्यवाहक प्रमुख डंगोलं खुयायंकूगु तिसा लितहयेगु निंतिं ग्वाहालि यायेत इनाप यानादीगु दु ।

कार्यवाहक प्रमुख डंगोलं येँया प्राचीन मूर्ति व सम्पदात केवल आकृति जक मखसे थ्व स्थानीयवासीतय् आस्था व विश्वास नं जूगु खँ धयादिसें अमूर्त सम्पदां थनया मौलिकता व ऐतिहासिकता क्वबुयाच्वंगुलिं थुकीया बिस्कं महत्व दुगु खँ राजदूत उर्बमयात धयादीगु खः । पुरातात्विक महत्व दुगु सम्पदात कूटनीतिक प्रक्रियापाखें थःथःगु थासय् लितहयेगु अभियानय् येँ महानगरपालिका दुगु खँ न्ह्यथनादिसें वय्कलं थ्व ज्याय् अमेरिकी सरकारपाखें ग्वहालि दइगु अपेक्षा नं यानादीगु खः ।

खुगू दशक न्ह्यः तलेजु भवानी द्यःया कण्ठहार खुयायंकूगु खःसा थौंकन्हय् थ्व अमेरिकाया शिकागोय् च्वंगु ‘आर्ट इन्स्टिच्यूट अफ शिकागो’ य् तयातःगु दु । थ्व स्वयां न्ह्यः नं पुरातत्व विभागं तलेजुया कण्ठहार लित बीत ‘आर्ट इन्स्टिच्यूट अफ शिकागो’ यात तःक्वः पौ छ्वयेधुंकूगु दु ।इन्स्टिच्यूटं थ्व नेपाःया हे खः धयागु आधिकारिक प्रमाणया अभाव दुगु धासें तिसा लित मबिसे च्वनाच्वंगु दु । तर कण्ठहारय् स्पष्ट रुपं नेपाःया जुजु प्रताप मल्लं दरवारया इष्टदेवीयात थ्व तिसा छाःगु धकाः न्ह्यथनातःगु दु ।

राजदूत नापलायेगु ज्याझ्वलय् महानगरपालिकाया प्रमुख प्रशासकीय अधिकृत सरोज गुरागाईं, अमेरिकी दूतावासया सार्वजनिक मामिला प्रमुख माइक हर्कर, राजनीतिक व आर्थिक मामिला प्रमुख केट लेही, सार्वजनिक मामिलाविज्ञ डा. ध्रुव शाह लगायतपिं दुगु खः ।