म्याराडोनाया उपचारय् लापरवाही याःपिंत मुद्दा तइगु
एजेन्सी- अर्जेन्टिनाया महान फुटबल कासामि डिएगो म्याराडोनाया उपचारय् लापरवाही याःगु द्वपनय् च्याम्ह स्वास्थ्यकर्मीयात मुद्दा तइगु जूगु दु । छगू छानविन समितिं उमिगु उपचारय् यक्व हे कमजोरी व अनियमितता दुगु लुइकेवं छम्ह न्यायाधिशं उमिविरुद्ध लापरवाहीपूर्ण हत्या याःगु द्वपनय् मुद्दा न्ह्याकेत आदेश बिउगु खः ।
अर्जेन्टिनाया राजधानी ब्युनर्स आयर्सय् सन् २०२० या नोवेम्भरय् ६० दँया उमेरय् हृदयघात जुयाः म्याराडोना मदुगु खः । वयां छुं न्हि न्ह्यव जक मस्तिष्कया अपरेशन याःम्ह म्याराडोनाया स्वास्थ्य अवस्था सुधार जुया वयाच्वंगु खः ।
म्याराडोना मदुगु छुं न्हि लिपा अर्जेन्टिनाया अभियोजनकर्तातय्सं उपचारय् संलग्न चिकित्सक व नर्सतय् अनुसन्धान सुरु याःगु खः । वंगु दँय् नीम्ह विज्ञ दुथ्याःगु छगू प्यानलं म्याराडोनाया उपचारय् संलग्न चिकित्सकतय् पुचलं अनुपयुक्त, अपर्याप्त व गैरजिम्मेवारीढंगं ज्या याःगु लुइकूगु खः ।
अदालतया कथं उगु प्यानलं यदि उपयुक्त चिकित्सा सुविधाय् कुगाक्क उपचार याःगु खःसा म्याराडोना म्वाइगु सम्भाना दइ धाःगु खः ।
आः म्याराडोनाया नशा सम्बन्धी निजी चिकित्सक, छम्ह मनोचिकित्सकया लिसें मेपिं निम्ह चिकित्सक, निम्ह नर्स व उमि हाकिमतय्त मुद्दा तयेत्यंगु खः । उमिसं धाःसा म्याराडोना सीगुलिइ थःपिं जिम्मेवार मदु धयाच्वंगु दु ।
यदि थ्व मुद्दाय् अभियोग पुष्टि जुल धाःसा उमिसं च्यादँ निसें नीन्यादँ तक जेल सजाय फयेमालेफु धाःगु दु । मुद्दाया सुनवाइ जुइगु ई धाःसा क्वःछिउगु मदुनि ।
म्याराडोना सीगु इलय् महान कासामिया अवस्था सुं हे ग्वाहालि याइपिं मदुगु थें खनेदुगु म्याराडोना कायया वकिल मारिओ बाउड्रीं समाचार संस्था रोयटर्सयात धाःगु दु ।
‘जिं मदुगु कारण न्यनेवं हे थ्व लापरवाहीपूर्ण हत्या खः धयागु खः । जिमिसं ताःहाकःगु लडाइँ त्याकाः थन तक थ्यंगु दु । छगू चरण पूवंगु दु’ वकिल बाउड्रीं धाःगुदु ।
म्याराडोनाया निम्ह म्ह्याय्पिंसं तःगु छगू उजुरीया कारणं कानुनी प्रक्रिया न्ह्याःगु खः । मस्तिष्कया शल्यक्रिया लिपा थः अबुया उपचारबारे उमिसं चिउताः प्वंकाः थ्व उजुरी तःगु खः ।
विश्वया सर्वकालित महान फुटबल कासामि मध्य छम्ह म्याराडोना मदयेवं जूगु पत्रकार सम्मेलनय् वया निजी चिकित्सक लुक ख्वख्वं थःम्हं थः पासाया ज्यान बचे यायेत हरसम्भव उपाय नालागु धाःगु खः ।
LEAVE YOUR COMMENTS