फिफा विश्वकप-२०२६ : अर्जेन्टिना फाइनलय्, उपाधिया निंतिं स्पेन म्हितीगु
एजेन्सी – साविक विजेता अर्जेन्टिना फिफा विश्वकप फुटबलया फाइनलय् दुहां वंगु दु । अर्जेन्टिना लगातार निक्वःगु व समग्रय् न्हय्क्वःखुसी विश्वकपया फाइनलय् दुहां वंगु खः । अमेरिकाया एट्लान्टा रंगशालाय् जूगु निगूगु सेमीफाइनलय् फुटबलया जननी इंग्ल्याण्डयात बुकाः अर्जेन्टिना लगातार निक्वःखुसी फाइनलय् दुहां वंगु खः ।
विहीवाः चान्हय् जूगु सेमीफाइनलय् इंग्ल्याण्डयात २-१ गोलं बुकाः फाइनलय् थाय् पक्का याःगु खः । छगू गोलं लिउने लानाच्वंगु अवस्थाय् निर्धारित ईया अन्तिम न्यागू मिनेट दुने उत्कृष्ट पुनरागमन याःगु खः । न्हापांगु हाफ गोलरहित बराबरीइ क्वचाःगु कासाय् निगूगु हाफया ५५ औं मिनेटय् एन्थोनी गोर्डनया गोलं इंग्ल्याण्डं अग्रता काःगु खः ।
छगू गोलं लिउने लानाच्वंगु स्थितिइ अन्तिम इलय् अर्जेन्टिनां निगू गोल यानाः लगातार निक्वःखुसी फाइनलय् थाय् दयेकूगु खः । ८५ औं मिनेटय् एन्जो फर्नान्डेजं गोल यानाः अर्जेन्टिनायात बराबरीइ हःगु खः । वयां लिपा ९ मिनेट थप जूगु इन्जुरी टाइमया निगूगु मिनेटय् लाउटारो मार्टिनेजं उत्कृष्ट हेड प्रहार यासे बलयात पोष्टया दिशा क्यनेवं अर्जेन्टिनां कासा त्याकूगु खः । पराजयलिसें ६० दँ लिपा विश्वकप त्याकेगु इंग्ल्याण्डया म्हगस त्वाःदःगु दु ।
न्हय्क्वःखुसी विश्वकपया फाइनलष्य् दुहां वनेगु झ्वलय् अर्जेन्टिनां याःगु निगुलिं गोलय् कप्तान लियोनल मेस्सीं ‘एसिस्ट’ याःगु खः । स्वक्वःतकया विश्व विजेता अर्जेन्टिना स्वक्वः हे उपविजेता नं खः । ३६ दँ तक उपाधि विहीन जुयाच्वंगु अर्जेन्टिनांं सन् २०२२ कतार विश्वकप उपाधि त्याकूगु खःसा आः उपाधि रक्षा यायेगु निंतिं स्पेन नाप म्हिती । फाइनल कासा सोमवाः चान्हय् नेपाःया ईकथं १२ः४५ ताः इलय् जुइ ।
अर्जेन्टिनायात कारवाही जुइगु
इंग्ल्याण्डयात बुकाः फाइनलय् दुहां वंगु अर्जेन्टिनी टिम विवादय् लाःगु दु । सेमीफाइनल कासा क्वचायेकाः लसता हनेगु झ्वलय् अर्जेन्टिनाया कासामितय्सं ‘फकल्याण्ड टापू अर्जेन्टिनायागु खः’ धइगु ब्यानर ब्वःगु खः । गुकियात कयाः फिफां अनुशासनात्मक कारवाही यायेफुगु बीबीसी स्पोर्टसं न्ह्यथंगु दु ।
अर्जेन्टिना व इंग्ल्याण्ड दथुइ दशकौं न्ह्यःनिसें फकल्याण्ड (माल्भिनास) टापूयात कयाः विवाद जुयाच्वंगु दु । थुगु टापूयात कयाः सन् १९८२ इ ७४ न्हु तक युद्ध जूगु खःसा उगु युद्ध इंग्ल्याण्डं त्याकूगु खः ।
LEAVE YOUR COMMENTS