ने. सं. ११४४ कौलाथ्व पारू - नःलास्वनेगु

रसायन भण्डारणया सुरक्षायात कयाः विश्वया चिउताः

एजेन्सी – लेबनानया राजधानी बेरुतय् वंगु मंगलवाः रासायनिक भण्डारणय् जूगु विस्फोटया घटनायात कयाः विश्वन्यंकंया रासायनिक भण्डारणप्रति चिउताः प्वंकूगु दु ।

अन्तर्राष्ट्रिय समाचार संस्थातय्सं राजधानी बेरुतय् जूगु रासायनिक पदार्थ विस्फोटया घटनां अस्ट्रेलियाया मानव वस्ती लिक्कं दुगु रसायनया ततःधंगु भण्डारणया सुरक्षायात कयाः चिउताः अप्वया वंगु खँ धाःगु दु । उगु थासय् खुद्वःनिसें झिंनिद्वः टन एमोनियम नाइट्रट भण्डारण यानातःगु संचारमाध्यमतय्सं न्ह्यथंगु दु। लिसें थन दँय्दसं प्यंगू लाख टन स्वयां अप्वः रासायनिक पदार्थ उत्पादन जुइगु संचारमाध्यमं न्ह्यथंगु दु ।

अथे हे अधिकारवादी संस्थातय्सं नं अस्ट्रेलियाया मानववस्ती लिक्कं लाःगु ततःधंगु रसायन भण्डारणया सुरक्षायात कयाः चिउताः प्वंकूगु दु। अधिकारवादी संस्थातय्सं राजधानी सिड्नीया उत्तरी क्षेत्रय् च्वंगु मानव वस्ती लिक्कं दुगु न्यूक्यालनय् च्वंगु बन्दरगाह सहरय् च्वंगु रासायनिक भण्डारण सुरक्षाया विषययात कयाः चिउताः प्वंकूगु दु ।

तःधंगु मात्राय् रसायन भण्डारण यानातःगु अमेरिका, बेलायत, रसिया, जापान लगायतया देशं बेरुतय् रसायन भण्डरणय् जूगु त्रुटीया कारणं मानवीय क्षति जूगु खँ धाःगु दु । बेलायतया शेफिल्ड विश्वविद्यालयया विशेषज्ञतय्सं बेरुतय् जूगु विस्फोटया शक्ति निक्वःगु विश्वयुद्धया इलय् जापानया हिरोशिमाय् कुर्कूगु अणु बमया शक्तिलिसे तुलना यायेबय् थ्व झिब्वय् छब्वः जूगु अनुमान याःगु दु। विस्फोटया सः २४०
किलोमिटर तापाक साइप्रस तक ताये दुगु खः ।

मेखे बेरुतय् जूगु विस्फोटया घटनायात कयाः अनुसन्धान याये न्ह्यः छुं छुं अधिकारीतय्त इमिगु हे निवासय् नजरबन्दय् तयागु लेबनान सरकारं न्ह्यथंगु दु। लेबनानया प्रधानमन्त्री हसन दीवं बेरुतय् भण्डारण यानातःगु २७५० टन एमोनियम नाइट्रेट ग्यास विस्फोट जूगु खँ धाःगु दु। रासायनिक पदर्थ भण्डारण यानातःगु गोदामय् विस्फोट जुयाः १३५ म्ह सीगु दुसा घाःपाः जूपिं प्यद्वलं मल्याक दु ।