अमेरिकी वाणिज्यदूतावास बन्द यायेगु सुरु

एजेन्सी – चीनया छेङदु शहरय् च्वंगु अमेरिकी वाणिज्यदूतावास बन्द यायेगु सुरु याःगु दु। अन स्थानीय ज्यामितय् छ्यलाः अमेरिकाया प्रतीक चिं शनिवाः हे चिइकूगु दु। बेइजिङं छेङदुइ च्वंगु वाणिज्य दूतावास बन्द यायेत आदेश बिइवं कन्हय् कुन्हु निसें हे दूतावासं सामान चीकेगु सुरु याःगु खः ।

अमेरिकां ह्यूस्टनय् च्वंगु चिनियाँ वाणिज्यदूतावास बन्द यायेत आदेश बिइवं उकिया ब्वला सायेकथं चीनं नं छेङदुइ च्वंगु अमेरिकी वाणिज्यदूतावास बन्द यायेत आदेश बिउगु खः । निगुलिं देशं थुपिं दूतावासं वं वयागु विरुद्ध वं वयागु विरुद्ध जासुरी यानाच्वंगु व राष्ट्रिय सुरक्षाय्ख तरा दुगु द्वपं बियाच्वंगु दु ।

चेङदुया महावाणिज्यदूतावास पूवंक गुबलय् बन्द जुइ धयागु अझं स्पष्ट मजूनिसां अन च्वंगु प्रतीक चिं, निशाना चिइकेधुंकूगु खँ एएफपीं धाःगु दु। अन आः अमेरिकाया ध्वाँय् जक ब्वयेकातःगु दु। शनिवाः स्वंगु ट्रक वाणिज्य दूतावासय् दुहां वंगु खँ धाःगु दु। वेइजिङं छेदुङया अमेरिकी वाणिज्यदूतावास बन्द यायेगु चीनया निंतिं वैधानिक व अति आवश्यक ज्या धाःगु दु। बेइजिबं छेङदुइ च्वंगु कुटनीतिक नियोगं चीनया राष्ट्रिय सुरक्षा व सरोकारय् खतरा ब्वलंगु द्वपं बिउगु दु ।

अमेरिकी अधिकारीतय्सं नं थ्वयां न्ह्यव ह्युस्टनया चिनियाँ वाणिज्यदूतावास बन्द यायेत आदेश बिउबलय् थज्याःगु हे द्वपं बिउगु खः । ह्युस्टनया नियोगं अमेरिकी कर्पोरेट गोपनीयताया लिसें स्वास्थ्य व वैज्ञानिक अनुसन्धानलिसे स्वापू दुगु सुचं खुयाकाःगु दावी याःगु खः ।

अमेरिकां ह्युस्टनया वाणिज्य दूतावास ७२ घन्टा दुने बन्द यायेत आदेश बिइवं शुक्रवाः दुने हे नियोगया ज्याकू बन्द यानाः अनया कर्मचारीं थाय् त्वःतावंगु खः । बेइजिङं अमेरिकी गुप्तचर निकायया मनूत जबर्जस्ती ह्युस्टन नियोगय् दुहां वःगु द्वपं बिउगु दु। चीनया विदेश मन्त्तालयं जारी याःगु वक्तव्यय् ह्युस्टन नियोग अन्तर्राष्ट्रिय कानुन कथं स्थापना जूगु व थ्व चिनियाँ सम्पत्ति जूगु खँ धाःगु दु ।