ने. सं. ११४४ कौलाथ्व तृतीया -

स्वयेबहपिं कासामि

जेभियर हर्नान्डेज, फरवार्ड, मेक्सिको

वेस्टह्याम युनाइटेडया फरवार्ड जेभियर हर्नान्डेज सन् २००९ निसें मेक्सिकोया लागि म्हिताच्वंगु दु । वेस्ट ह्यामपाखें ३३ कासा म्हिताः च्यागू गोल याःम्ह हर्नान्डेजं म्यानचेस्टर युनाइटेड, रियल म्याड्रिड व जर्मन क्लब वायर लिभरकुलेनपाखें नं म्हितेधुंकल ।‘चिच्याटिटो नामं लोकंह्वाःम्ह जेभियर मेक्सिकोया लागि १०४ कासा म्हिताः ५० गोल याये धुंकल ।

जेभियर ५० औं गोल जारी विशवकपय् द. कोरिया विरुद्ध याःगु खः ।विश्वकप छनोट चरणय् मेक्सिकोया निंतिं स्वंगू गोल याःम्ह हर्नान्डेजया थ्व लगातार स्वंगूगु विश्वकप खः । ३० दँयाम्ह हर्नान्डेज स्वंगुलिं विश्वकपय् गोल याःम्ह स्वम्हम्ह मेक्सिन कासामि खः ।

डेनिस जाकारिया, मिडफिल्डर, स्वीट्जरल्यान्ड

२१दँया डेनिस जाकारिया स्वीस टिमयाम्ह डिफेन्सिभ मिडफिल्डर खः । सन् २०१६य् तिनि स्वीस टिमय् डेब्यु याःम्ह जाकरिया ब्रोसिया मोन्चेग्लाडबच क्लबया कासामि खः । बुन्डेस लिगाय् जाकारियाया ३३ गू कासा म्हिताः निगू गोल याःगु दु ।स्वीस टिमया लागि ११ कासा म्हितेधुंकूम्ह जाकारिया उत्कृष्ट बल पास व कन्ट्रोल यायेफुम्ह कासामि खः ।

जाकारिया बांमलाःगु पक्ष धयागु व तसकं यक्व तंचाये यः । थज्याःगु व्यवहारं वं तःकः हे म्हासुगु कार्ड नयेधुंकूगु दु ।जाकारियां सन् २०१६ य् युरो नं म्हितूगु खःसा विश्वकपय् धाःसा थुगुसी डेब्यु याःगु खः ।