च्याम्पियन्स लिगय् रोनाल्डोयात रेड कार्ड

च्यापियन्स लिग अन्तर्गत समूह चरणया म्हिगः जूगु कासाय् झीम्ह कासामिइ सीमित जूगु युभेन्ट्सं भ्यालेन्सियायात २—० गोलं बुकूगु दु । समुह ‘एच’य् युभेन्टसया निंतिं निगुलिं गोल पेनाल्टी पाखें मिरालेन पिजानिकं याःगु खः । कासाया ४५ औं व ५१ औं मिनेटय् पिजानिकं गोल याःगु खः ।

थ्व कासाय् युभेन्टसपाखें न्हापांगु च्यापियन्स लिग कासाय् म्हितःवःम्ह स्टार कासामि क्रिष्टियानो रोनाल्डो २९ औं मिनेटय् ह्याउँगु कार्ड नयाः मैदान त्वःतेमाःगु खः । भ्यालेन्सियाया डिफेन्डर जेसन मुरिलोया सँ साःगु धकाः रोनाल्डोयात तप्यंक हे ह्याउँगु कार्ड क्यंगु खः। ह्याउँगु कार्ड बिउगुलिं स्तब्ध जूम्ह रोनाल्डो ख्वख्वं मैदान त्वःगु खः ।

च्यापियन्स लिगय् रोनाल्डों म्हितूगु १५४ गू कासाय् थ्व न्हापांगु ह्याउँगु कार्ड खः ।समूह एच अन्तर्गत जूगु मेगु कासाय् म्यानचेस्टर युनाइटेडं यङ ब्वाइजयात ३–० गोलं बुकल । युनाइटेडया निंतिं पाउल पोग्बां निगू व एन्थोनी मार्सियलं छगू गोल याःगु खः । पोग्बा ३१ औं मिनेटय् व ४४ औं मिनेटय् गोल याःगु खः ।

कासाया ६६ औं मिनेटय् मार्सियल गोल याःगु खः। अथेहे समुह इया कासाय् बायर्न म्युनिखं पोर्चुगिज क्लब बेन्फिकायात २–० गोलं बुकल । कासाया १० औं मिनेटय् रोबर्टो लेवान्डोस्कीं याःगु गोलं म्युनिखं अग्रता काःगु खःसा निगूगु हाफया ५४ औं मिनेटय् रेनटो सान्चेज थप छगू गोल याःगु खः ।

थ्व हे समूहय् च्वंगु एइके एथेन्सयात अजेक्सं ३–० गोलं बुकूगु दु ।समूह एफ अन्तर्गत जूगु कासाय् म्याचेस्टर सिटीयात फ्रेन्च क्लब लियोनं २–१ गोलं बुकूगु दु । लियोनया निंतिं न्हापागुं हाफया २६ औं मिनेटय् म्याक्सवेल कर्नेट व ४३ औं मिनेटय् नविल फेकिरं गोल याःगु खः। सिटीया निंतिं छगू जक गोल निगूगु हाफय् बर्नाडो सिल्भां ६७ औं मिनेट याःगु खः ।

थ्व समूहय् च्वंगु होफेनहाइम व शख्तर डोनेस्कं धाःसा २—२ गोलया बराबरी म्हितूगु खः।समुह ‘जी’इ लाःगु साबिक विजेता रियल म्याड्रिडं रोमायात ३—० गोलं बुकल । म्याड्रिडया निंतिं इस्काें ४५ औैं मिनेटय्, ग्यारेथ बेलं ५८ औं मिनेटय् व मारिएनों इन्जुरी टाइमय् गोल याःगु खः । थ्व हे समूहया भिक्टोरिया प्लेजन व सिएसके मस्को दथुइया कासा २–२ गोलया बराबरीइ क्वचाःगु खः ।

सम्बन्धित बुखँ

LEAVE YOUR COMMENTS