१७ निसें ३५ दँ दुपिं अप्वः दुर्घटनाय्
स्वनिगलय् न्हियान्हिथं धइथें हे सतक दुर्घटनाया समाचार वयाच्वंगु दु । थज्याःगु सतक दुर्घटनाय् सीपिंमध्ये दकलय् अप्वः १७ निसें ३५ दँ दुपिं दु । चालु आर्थिक दँया न्हापांगु झिलाया अवधिइ स्वगिनलय् जूगु सवारी दुर्घटनाय् सीपिं १४९ म्हमध्ये १७ निसें ३५ दँ दुपिं ८० म्ह दु । अथेहे १६ दँनिसें ३६ दँ उमेर समूहयापिं ५४ म्ह सवारी दुर्घटनाय् सीगु दु ।
चालु आर्थिक दँय् स्वनिगलय् जक ५,१८० सवारी दुर्घटना जूगु तथ्यांक दु । थ्व दुर्घटनाय् १४९ म्ह सीगु दुसा १८४ म्ह गम्भिर घाःपाः व ४८५ सामान्य घाःपाः जूगु तथ्यांक दु । म्हानगरीय ट्राफिक प्रहरी महाशाखाया प्रमुख वसन्तकुमार पन्तया कथं १६ निसें ३५ दँ उमेर समूहयापिंसं तीव्र गतिं सवारी चले याइगु कारणं यानाः आपालं दुर्घटना जूगु धयादी ।
‘दुर्घटनाय् सीपिंमध्ये नं अप्वःथें मोटरसाइकल चले याइपिं दु’ वय्कलं धयादी । वंगु आर्थिक दँय् नं १६ निसें ३५ दँ उमेर समूहयापिं हे दकलय् अप्वः सवारी दुर्घटनाय् सीगु महाशाखाया तथ्यांक दु । सवारी दुर्घटनाय् आ.व. २०७२÷०७३ य् सीपिं १६६ मध्ये ९२ व आ.व. ०७३÷७४ य् १८२ मध्ये ८६ म्ह व हे उमेर समूहयापिं लाःगु दु ।
महाशाखा प्रमुख पन्तया कथं स्वनिगलय् जुइगु सवारी दुर्घटना न्हिनसिया इलय् स्वयां बहनी अप्वः जुइगु यानाच्वंगु दु । सवारी साधन आपालं दुगु व सतक नं चिब्या जूगुलिं यानाः गुलिखे सवारी साधन थवंथवय् ठक्कर नयाः नं दुर्घटना जुइगु यानाच्वंगु महाशाखां न्ह्यथंगु दु । थौंकन्हय् स्वनिगलय् ११ लाख ३२ हजार ९२५ सवारी साधन वयेवने यायेगु यानाच्वंगु दुसा देय्न्यंकं २७ लाखया हाराहारीइ सवारी साधन दु ।
स्वनिगलय् जक थीथी पीगू ट्राफिक प्रहरी इकाइपाखें सवारी व्यस्थापनया ज्या जुया वयाच्वंगु दुसा ट्राफिक दरबन्दी म्हो व सवारी साधनया ल्याः अप्वःगुलिं स्वनिगःया ट्राफिक व्यवस्थापनय् समस्या जुया वयाच्वंगु महाशाखा प्रमुख पन्तं धयादी । नेपाल यातायात व्यवसायी राष्ट्रिय महासंघया महासचिव सरोज सिटौलाया कथं पूर्वाधारया अभाव व तीव्र गतिं सवारी साधन चले याइगुलिं दुर्घटना अप्वःगु खः ।
स्वनिगलय् थःगु सवारी साधनलिसें मेपिनिगु सवारी साधनया कारणं नं आपालं दुर्घटना जुइगु यानाच्वंगु दु’, वय्कलं धयादी ।स्वनिगलय् जुइगु सवारी दुर्घटनाय् सीपिं मिसापिं स्वयां मिजंत अप्वः दु । महाशाखाया कथं आ.व. २०७२÷०७३ य् १३० मिजं व ३५ मिसा, आ.व. ०७३÷०४ य् १२१ मिजं व ६१ मिसा व चालु आर्थिक दँय् ११७ मिजं व ३२ मिसा थीथी सवारी दुर्घटनाय् लानाः सीगु दु ।
महाशाखां चालु आर्थिक दँय् ऐन कानुन अःखः सवारी चले याइपिं स्वंगू लाख न्हय्च्याद्वः गुसः व नीन्हय्म्ह चालकयात कारवाही याःगु दु । उकीमध्ये लेन अनुशासनय् स्वीच्याद्वः च्यासः व झिंप्यम्ह, मापसेय् नीखुद्वः गुसः व सछि व ग्वीन्हय्म्ह कारवाहीलय् लाःगु दुसा ट्याक्सी कारवाहीइ ६,६८०, जेब्रा क्रसिङ कारवाहीइ ७,३९७, हर्न कारवाहीइ १३,०१९, सिसिटिभीया माध्यमं १,९६३, बडी वान क्यामराय् ६,५६३, बुलेट मोटरसाइकल चालक ६,८०२ व मेमेगु कारवाहीलय् यानाः निगू लाख न्हय्छद्वः प्यसः व ग्वीनिम्ह लाःगु दु ।
स्वनिलय् सवारी साधनया चाप अप्वःगुलिं ट्राफिक व्यवस्थापनय् तसकं समस्या जुयाच्वंगु दु । महाशाखाया कथं थौंकन्हय् स्वनिगलय् छम्ह ट्रापिक प्रहरीं १,०४४ सवारी साधन व्यवस्थापन याना वयाच्वंगु दु ।
LEAVE YOUR COMMENTS