भिंद्यःया पसः बारे मनपायात कारण देखाऊ

येँ(नेपालभाषा टाइम्स)- थनया वडा नं. २० स्थित भिंद्यः त्वालय् च्वंगु भिंद्यःया देगलय् तयातःगु पसः कवः बन्द याका बिउगु विरुद्ध सर्वोच्च अदालतं येँ महानगरपालिकायात कारण देखाऊ आदेश जारी याःगु दु ।

सर्वोच्चं थ्व खँय् येँ महानगरपालिका व उगु पसः कवः बन्द याकेत मनपाय् उजुरी तःवंम्ह शिवसुन्दर कर्माचार्य विरुद्ध समेत कारण देखाऊ आदेश बिउगु खः । लिसें भिंद्यःया पसः कवः बन्द यायेगु येँ महानगरपलिकाया निर्णय तत्काल कार्यान्वयन याके मते धकाः अल्पकालीन अन्तरिम आदेश नं बिउगु दु ।

भिंद्यःया देगलय् तयातःगु उगु पसः कवः बन्द याकेगु ज्यां यानाः वहे पसःया बाः कयाः सञ्चालन याना वयाच्वंगु भिंद्यः व पचली भैरवया जात्राया लागिं आवश्यक खर्च मदइगु व थुकिं यानाः परम्परांनिसें सञ्चालन जुया वयाच्वंगु जात्रा पर्व प्रभावित जुइगु धासें देगःया थुवाः जयराम मल्लपिंसं सर्वोच्चय् रिट दायर याःगु खः ।

उगु रिटयात कयाः जूगु वहस लिपा सर्वोच्च अदालतया एकल इजलासं थ्व सम्बन्धी छु गथे जूगु खः धकाः न्यनेमाःगु धासें कारण देखाऊ आदेश बिउगु खः । भिंद्यःया पसः कवलं वयाच्वंगु बालय् दावी यानाच्वंम्ह शिव कर्माचार्यं मनपाय् तःगु उजुरीया लिधंसाय् मनपां अनया पसः कवः बन्द याना बिउगु खः ।