रविया पासपोर्ट सम्बन्धी भ्वं मालेगु शुरु
येँ (नेपालभाषा टाइम्स)÷राष्ट्रिय स्वतन्त्र पार्टीया सभापति रवि लामिछानें छक्वलं निगू देशया पासपोर्ट काःगु धासें लाःगु उजुरीइ जिल्ला सरकारी वकिलया कार्यालयं आवश्यक भ्वं मुनेगु ज्या न्ह्याकूगु दु । वंगु मंगलवाः जाहेरी लायेवं सरकारी वकिलया ज्याकुथिं थीथी स्वंगू निकायपाखें लामिछानेया नागरिकता व पासपोर्ट सम्बन्धी भ्वं मगे याःगु खः ।
येँया जिल्ला सरकारी वकिल ज्याकूया प्रमुख सहन्यायाधिवक्ता अच्यूतमणी नेउपानेया कथं अध्यागमन विभाग, जिल्ला प्रशासन कार्यालय येँ व
राहदानी विभागयात पौ च्वयाः लामिछानेया राहदानी व नागरिकता सम्बन्धी भ्वं मगे याकूगु खः ।
लामिछानें अमेरिकी नागरिकया हैसियतं नेपाः वयाः नेपाःया नं पासपोर्ट काःगुलिं फौजदारी अपराध लगे जुइगु बारे अनुसन्धान यानाः कारबाही यायेमाः धासें युवराज पौडेलं तःवःगु निवेदन प्रहरीं दर्ता मयायेवं लिपा जिल्ला सरकारी वकिलया कार्यालयय् दर्ता याके यंकूगु खः ।
सरकारी वकिलया कार्यालयय् बिउगु निवेदनय् रवि लामिछानें याःगु कसुर तत्काल प्रचलित राहदानी ऐन, २०२४ या दफा ५ या खण्ड (ख) व थौंकन्हय् प्रचलित राहदानी ऐन, २०७६ या दफा २१ या खण्ड (क) पाखें निषेध यानातःगु सीक सीकं झुठा विवरण बियाः नेपाःया पासपोर्ट काःगुलिं राहदानी ऐन, २०२४ या दफा ५ या खण्ड (ख) य् यानातःगु व्यवस्था कथं कसुरदार रवि लामिछानेयात न्यादँ तक कैद व हदै तकया जरिवाना समेत कायेगुु कथं कानुन बमोजिम मुद्दा न्ह्याकेमाः धकाः जिकिर यानातःगु दु ।
LEAVE YOUR COMMENTS