नकली भूटानी शरणार्थी प्रकरण ः टोपबहादुरयात पूर्जी, सचिव ज्वन
येँ (नेपालभाषा टाइम्स)÷नेपाःमि– तय्त नं नकली भूटानी शरणार्थी दयेकाः अमेरिका छ्वया बी धकाः करोडौं तका दां ठगे याःगु काण्डय् पुलांम्ह मन्त्री लिसें एमालेया सचिव एवं सांसद टोपबहादुर रायमाझीयात नं ज्वनेगु आदेश जारी जूगु दु । रायमाझाी माओवादीया नं पुलांम्ह नेता खः । लिपा मन्त्री जुइगु लोभय् माओवादी त्वःताः एमालेय् वंम्ह खः ।
म्हिगःया येँया जिल्ला अदालतं रायमाझी लगायत वया काय सन्दिप रायमाझीयात नं ज्वनेगु आदेश बिउगु खः । लिसें थ्वहे प्रकरणय् ल्हाः दुगु द्वपनय् तत्कालिन गृह सचिव टेकनारायण पाण्डेयात नं ज्वंगु दु । थौंकन्हय् उपराष्ट्रपति कार्यालयया सचिव जुयाच्वंम्ह पाण्डेयात अनुसन्धानया लागिं स्वन्हु कुनीगु जूगु दु ।
थ्व स्वयां न्ह्यः अदालतं एमालेया मेम्ह नेता लिसें पुलांम्ह गृहमन्त्री रामबहादुर थापाया सुरक्षा सल्लाहकार इन्द्रजित राईयात नं ज्वनेधुंकूगु दु । अदालतं पुलांम्ह मन्त्री बादलया काय प्रतीक थापा विरुद्ध नं पक्राउ पूर्जी जारी यायेधुंकूगु दु ।
पक्राउ पूर्जी जारी जूगु इलय् टोपबहादुर रायमाझी अर्घाखाँचीइ पार्टीया ज्याय् खटे जुयाच्वंगु खः । रायमाझीं अन हे पत्रकारतलिसे खँ ल्हासें थुकिया बारे थम्हं छुं नं मसिउ धाःगु दु । आः थः येँय् वनाः थुकिया बारे बुझे यायेगु धासें रायमाझीं थ्व प्रकरणय् कानुनयात ग्वाहालि यायेगु खँ धाःगु दु । रायमाझीं थ्व प्रकरणय् थम्हं छुं मसिउ धासें उगु इलय् थः कायया नामय् छगूत्या करोड तकाया चेक वःगु व थःपिंसं आः तक उगु चेक महिउसे तयातयागु खँ नं धाःगु दु । थ्व चेक गनं वःगु व छाय् वःगु धइगु खँ धाःसा रायमाझीं खुले याःगु मदुनि ।
नेपाःमितय्त नकली भ्वं हे मेगु दयेकाः भूटानी शरणार्थी दयेकुसें अमेरिका छ्वयेगु थ्व ज्याया लिउने आपालं उच्च पदस्थ मनूतय् ल्हाः दयेमाः धकाः अनुमान याःगु दु । थुकी तत्कालीन गृहमन्त्री रामबहादुर थापाया समेत ल्हाः दयेमाः धकाः मालेगु ज्या जुयाच्वंगु खँ नं धाःगु दु । लुमंकेबहः जू, रायमाझी व थापा निम्हं माओवादी त्याग यानाः एमालेय् दुहां वंपिं खः ।
थुमिसं नकली भूटानी शरणार्थी दयेकाः अमेरिका छ्वया बी धकाः ८७५ म्ह मनूतय्के ध्यबा म्हयातःगु द्वपं लानाच्वंगु दु । थुमिसं नेपाःया थीथी जिल्लाय् च्वंपिं मनूतय्के १० लाख निसें ५० लाख तका तक ध्यबा म्हयातःगु खँ धाःगु दु । पीडिततय्सं बिउगु उजुरीया आधारय् प्रहरीं आः तक न्हय्म्ह मनूयात ज्वनेधुंकूगु दुसा उमिसं हे बिउगु बयानया आधारय् थुमित नं ज्वनेगु ज्या न्ह्याकूगु खः ।
LEAVE YOUR COMMENTS