कात्ति प्याखनय् म्हिगः युद्धकला न्ह्यब्वल

यल – थनया धार्मिक व सांस्कृतिक महत्वं जाःगु कात्ति प्याखं अन्तर्गत म्हिगः युद्धकला नृत्य क्यन । स्वनिगःया हे दकलय् ताःहाकःगु नाट्य महोत्सवकथं कायेगु यानातःगु कात्ति प्याखं अन्तर्गत म्हिगः खुन्हुया न्हिकुन्हु युद्धकला प्याखं क्यंगु खः । यल लायकूस्थित मंगलबजारय् च्वंगु प्यम्ह नारांद्यःया न्ह्यःने च्वंगु कात्ति दबुलिं न्हियान्हिथं सनिलया ७ ताःइलंनिसें थ्व कात्ति प्याखं क्यनेगु यानाच्वंगु दु ।

म्हिगः न्हापांगु चरणया प्याखय् उषाहरण व माधवानल लीला सम्बन्धी युद्धकला न्ह्यब्वःगु खः । थुगु प्याखं अन्तर्गत महाद्यः व कृष्णया दथुइ जूगु युद्ध नं क्यनेज्या जूगु कात्ति प्याखं संरक्षण समितिया अध्यक्ष किरण प्रधानं कनादिल ।

वंगु कात्तिक १५ निसें शुरु जूगु थुगुसीया कात्ति प्यानय् न्हापांगु न्हि सुदामा प्याखं, निन्हुया न्हिकुन्हु भक्त सुरदास प्याखं व स्वन्हुयान्हिनिसें न्यान्हुया दिं तक बाथः प्याखनय् आधारित प्याखंत क्यनेगु ज्या जूगु खः ।

वि.सं. १६९७ सालय् यलया तात्कालीन जुजु सिद्धिनरसिंह मल्लं कात्ति प्याखंया शुरुयात याःगु इतिहासय् न्ह्यथनातःगु दु । १७ गूगु शताब्दीइ शुरु जूगु विष्णु पुराणय् आधारित कात्ति प्याखनय् विष्णुया अवतार, नृर्सिह, हिरण्यकश्यपु, विष्णुया भक्त प्रल्हादया बाखनय् आधारित प्याखं क्यनेगु याना वयाच्वंगु दु ।

सम्बन्धित बुखँ

LEAVE YOUR COMMENTS