मोबाइल लुटपाट बारे सुक्ष्म अध्ययन

येँ (नेपालभाषा टाइम्स)- म्हीग सोमवाः बालाजुइ जूगु यातायात मजदुर व व्यवसायीतय् आन्दोलनया झ्वलय् ल्होत्से मल दुने च्वंगु मोबाइल पसलय् लुटपाट याःगु घटनायात कयाः अनुसन्धान यायेत गृह मन्त्रालयं प्रहरीयात निर्देशन बिउगु दु ।

आन्दोलनकारी पुचलं ग्वंगःबुँइ च्वंगु ल्होत्से मलय् चले यानाच्वंगु मोबाइल पसलं मोबाइल लुटपाट याःगु भिडियो सामाजिक सञ्जालय् सार्वजनिक जूगु खः । म्हिगः गृह मन्त्रालयया सचिव विनोदप्रकाश सिंहं प्रहरी महानिरीक्षक धिरजप्रताप सिंहयात फोन यानाः उगु घटनाय् दुथ्याःपिंत म्हसीकाः कारबाही यायेत निर्देशन बियादीगु खः ।

थ्वहे झ्वलय् ल्होत्से मलय् दुहां वनाः लुटपाट याःगु आशंकाय् प्रहरीं प्यम्हेसित न्हूगु बसपार्क लागां ज्वंगु दु । घटनाय् मेपिं नं आपालं मनूत दुथ्याये फइगु धासें प्रहरी ज्वंपिनिगु नां सार्वजनिक धाःसा याःगु मदुनि ।

लुटपाटया झ्वलय् थ्यंमथ्यं च्यागू निसें झिगू करोड तका बराबरया मोबाइल व मोबाइलया ज्वलं लुटपाट जूगु खँ व्यवसायीतय्सं धाःगु दु । व्यवसायीतय् संगठनं थुकिया विरोध यायेधुंकूगु दु ।

येँ महानगर प्रहरी वृत्त महाराज– गञ्जया डीएसपी अंगुर जिसीया कथं छुं मनूतय्त लुटपाटया आशंकाय् ज्वंगु दुसा आः उमिगु बारे सुक्ष्म अनुसन्धान जुयाच्वंगु दु । लिसें प्रहरीं घटनास्थलय् तयातःगु सीसीटीभी फुटेजया अध्ययन यायेगु लिसें प्रत्यक्षदर्शीतय्के न्यनेकने यायेगु ज्या नं यानाच्वंगु दु ।

यातायात मजदूर व व्यवसायीतय्सं याःगु आन्दोलनया झ्वलय् उगु लुटपाट जूगु खःसां लुटपाट याःपिं मनूत धाःसा यातायात मजदूरत हे थें मच्वंगु खँ धाःगु दु । अप्वः धइथें मनूत हेलमेट पुनाः लुटपाट याःगु जूगुलिं प्रहरीं थुकियात शंकास्पद रुपय् काःगु दु ।