प्रधानमन्त्री निवासय् टि–२० विश्वकप ट्रफी

ख्वप (नेपालभाषा टाइम्स)- आइसिसी टी–२० विश्वकप २०२२ या ट्रफी बुधवाः थीथी थासय् प्रदर्शन याःगु दु । अथेहे ट्रफियात प्रधानमन्त्री निवास नं यंकूगु दु । सोमवाः नेपाः थ्यंकःहःगु ट्रफियात बुधवाः ख्वपया दरबार स्क्वायर, न्यातपोल, चन्द्रागिरीइ् प्रदर्शन याःगु खः । ट्रफीयात दकलय् न्हापां ख्वपया दरबार स्क्वायर चाःहिकाः न्यातापोल देगलय् ब्वःगु खः ।

अथेहे प्रधानमन्त्री निवास बालुवाटरय् यंकाः प्रधानमन्त्री शेरबहादुर देउवायात नं ट्रफी क्यने यंकूगु खः । ट्रफी ब्वयेगु ज्याझ्वलय् नेपाल क्रिकेट संघ (क्यान) या क्रिकेट मेनेजर विनोद दास, महिला राष्ट्रिय क्रिकेट टिमया कप्तान रुबिना क्षेत्रीलिसें थीथी क्रिकेट कासामितय्सं ब्वति काःगु खः । ज्याझ्वलय् धिमे बाज लिसें लाखे प्याखं नं क्यंगु खः ।

विश्वकपया ट्रफी सोमवाः नेपाः थ्यंगु खः । ट्रफी सागरमाथाया गोक्यो तालय् ब्वयेगु ज्याझ्वः दुगु खःसां खराब मौसमया कारणं अन ट्रफी ब्वयेगु ज्याझ्वः जुइमफुत । ट्रफी मंगलवाः येँया चन्द्रागिरीइ नं ब्वःगु खः ।

क्रिकेट विश्वकपया ट्रफी नेपालय् ब्वःगु थ्व निक्वखुसी खःसा टी–२० विश्वकपया ट्रफी न्हापांखुसी नेपालय् प्रदर्शन जूगु खः । सन् २०१८ एकदिवसीय विश्वकपया ट्रफी नेपालय् ब्वःगु खः ।

आइसिसी विश्वकप टी–२० थ्व हे वइगु अक्टोबर १६ तारिख निसें नोभेम्बर १३ तारिख तक अस्टे«लियाय् जुइत्यंगु दु । विश्वकपय् १६ गू राष्ट्रं ब्वति काःगु दु, तर नेपाः धाःसा थुगुसीया विश्वकपय् छनोट जुइत असफल जूगु खः ।