शनिवाः नेपाः विरुद्ध बंगलादेश म्हितीगु

एजेन्सी- साफ यु–१९ महिला फुटबल च्याम्पियनसिपय् डिसेम्बर ११ तारिख शनिवाः निसें बंगलादेशया ढाकाय् शुरु जुइत्यंगु दु । साफ यु–१९ च्याम्पियनसिपया न्हापांगु कासाय् शनिवाः नेपालं बंगलादेश विरुद्ध धेंधेंबल्लाः यायेत्यंगु दु । बंगलादेश न्हापांगु संस्करणया विजेता खःसा नेपा उपविजेता खः ।

न्हापांगुु संस्करणया फाइनल कासा नेपालं बंगलादेशलिसे १–० गोलं बूगु खःसा समूह चरणया कासा नं नेपाःयात बंगलादेशं २–१ गोलं बुकूगु खः । नेपाःया कप्तान अन्जना रानामगरं बंगलादेशयात बुकाः न्हापांगु संस्करणय् जूगु पराजयया बदला कायेगु धकाः धाःगु दु ।

बंगलादेश वने न्ह्यः नेपालय् जूगु पत्रकार सम्मेलनय् कप्तान रानामगर टिमया मूआज्जु साफ च्याम्पियनसिपय् बंगलादेश व भारतयात बुकेगु व उपाधि त्याकेगु धकाः धाःगु खः । प्र्रशिक्षक हरि ओम श्रेष्ठ नं नेपालं उपाधी त्याकीगु धकाः धाःगु खः ।

थुगुसी यु–१९ साफ महिला च्याम्पियनसिपय् मुक्कं न्यागू देशं ब्वति काःगु दु । राउन्ड रोबिनया आधारय् कासा जुइसा शीर्ष निगू टिमया दथुइ फाइनल कासा जुइ ।

नेपालं थःगु निगूगु कासा डिसेम्बर १५ य् श्रीलंकालिसें, स्वंगूगु कासा डिसेम्बर १७य् भुटानलिसे व अन्तिम कासा डिसेम्बर १९ य् भारतलिसे म्हितीगु जुइ ।

सम्बन्धित बुखँ

LEAVE YOUR COMMENTS