सन् २०२६या विश्वकप स्वंगू देशय्

सन् २०२६या विश्वकप फुटबलया आयोजना स्वंगू देशं मंकाःकथं याइगु जूगु दु । संयुक्त राज्य अमेरिकाया नेतृत्वय् क्यानडा व मेकिसकों विश्वकप आयोजना यायेत्यंगु खः । थुकिया औपचारिक घोषणा फिफां याःगु दु । विश्वकप फुटबलया २१ औं संस्करण थनिंनिसें शुरु जू वनाच्वंगु दुसा व स्वयां छन्हु न्ह्यः फिफा कंग्रेसय् जूगु मतदानं सन् २०२६या फुटबल आयोजना याइगु देय्या नां घोषणा याःगु दु ।

सन् २०२६या विश्वकप फुटबलया आयोजना संयुक्त राज्य अमेरिका, मेक्सिको व क्यानाडा स्वंगू देशं मंकाःकथं यायेगु निंतिं ‘मंकाः २०२६’या नापं प्रस्तावं याःगु खः । थ्व स्वंगू देय् बाहेकं मोरक्कों एकल आयोजनाया प्रस्ताव याःगु खः । तर मोरक्कोयात बुकाः स्वंगू देशं मंकाःकथं आयोजना यायेगु प्रस्तावं बाजी त्याकल । विश्व फुटबलया सर्वोच्च निकाय फिफाया कुल २११ सदस्य राष्ट्रमध्ये २०० राष्ट्रं मतदान याःगु खः ।

बुधवाः रुसया राजधानी मस्कोय् जूगु फिफा कंग्रेसय् जूगु मतदानय् स्वंगू देय्या मंकाः आयोजनाया पक्षय् १३४ मत कुतुं वंगु खःसा जबकि मोरक्कोया एकल आयोजनाया पक्षय् ६५ मत जक वंगु खः । उकीमध्ये छगू राष्ट्रं सुयागुं पक्षय् नं मत मबिउ ।
आयोजक राष्ट्रया धलखय् लाःगु प्यंगुलिं देशं मतदान याये मखनसा भ्रष्टाचारया द्वपं लानाच्वंगुलिं देय्या फुटबल संघ हे विघटनय् लानाच्वंगु अफ्रिकी राष्ट्र घाना अनुपस्थित जुल ।

मतदानय् ब्वति मकाःगु सदस्य राष्ट्रय् अमेरिका अधिनस्थ गुआम, युएस भर्जिन आइसल्याण्ड व प्युर्टोरिको खः । सन् २०२६ य् जुइगु विश्वकप फुटबलया ८० गू कासा मध्ये ६० प्रतिशत अमेरिकाय् जुइ । गुकी लिग चरणया छुं छुं कासानापं क्वार्टरफाइनलनिसें दक्वं कासा अमेरिकाय् जुइ । अथे हे सन् २०२६ या विश्वकप फुटबलय् ४८ राष्ट्रया सहभागिता दइगु जूसा कासा ३४ न्हुतक न्ह्याइ ।

मेक्सिको व अमेरिका निगुलिं देशं थ्व स्वयां न्ह्यःनं विश्वकप फुटबलया आयोजना यायेधुंकूगु दुसा उकीमध्ये मेक्सिकों सन् १९७० व १९८६ यानाः निक्वः व अमेरिकाय् सन् १९९४ य् विश्वकप जूगु खः । सन् २००२ लय् जूगु विश्वकप फुटबल जापान व कोरिया निगू देशं मंकाःकथं ग्वसाः ग्वःगु खः । सन् २०२२या विश्वकप फुटबल कतारय् जुइगु जूगु दु ।