क्वाःक्वाः झंगः लात मखुला ?

सरकारं सोझासिधापिं ज्याथजिथिपिंत ध्वं लाःगु दु । खय्तला सरकार वा राज्य थीथी निकाय जक मखु राजनीतिक दलया नेतातय्गु ज्या धइगु हे आम नागरिक व सोझासिधापिं जनतायात अले मुक्कं देय्यात हे झंगः जक लायेगु ज्या खः । अले थ्व देय्या नेता व राजनीतिक दलत सरकार वनेगु व आम जनतायात ध्वं लायेगु खः ।

अझ वर्तमान स्वब्वय् निब्वः स्पष्ट बहुमत दु धाःगु नेपाल कम्युनिष्ट पार्टी (नेकपा) या सरकारं ला तप्यंक हे बुराबुरितय्त क्वाःक्वाः हे झगं लात । संघ व प्रदेशया निर्वाचनया इलय् तत्कालीन नेकपा (एमालें) थःगु चुनावी घोषणापत्रय् यदि एमाले सरकारय् वन धाःसा वृद्धभत्ता वृद्धि यानाः लय् न्याद्वः तका यायेगु खँ उल्लेख यानातःगु खः ।

वर्तमान प्रधानमन्त्री केपी शर्मा ओलीं निर्वाचनया इलय् थाय्थासय् जूगु चुनावी सभाय् संबोधन याःगु इलय् नं वय्कलं ‘यदि एमाले सरकारय् वन धाःसा छेँय्छेँय् हे वनाः बुराबुरितय्त इमिगु हे ल्हातय् न्याद्वः तका दां तयाबीगु जुइ’ धकाः सार्बजनिक रुपं हे अभिव्यक्ति बियादीगु खः । दसुकथं वय्कलं चुनावया इलय् प्वंकादीगु उकथंया अभिव्यक्तिया भिडियो थौंकन्हय् सामाजिक संजालय् व्यापक रुपं भाइरल जुयाच्वंगु दु ।

यदि वय्कलं उगु इलय् थम्हं धयागु खँ ल्वःमंगु खःसा व भिडियो छक्वः स्वयादीसां जिउ । नेकपा (एमालें) संघ व प्रदेशया निर्वाचनया इलय् वृद्धभत्ता लय् न्याद्वः तका थ्यंकेगु धकाः घोषणा पत्रय् हे न्ह्यथनेगु नापं चुनावी सभाय् नं थाय्थासय् नवाःगुलिं यानाः अबलय् बुराबुरित तसकं लय्ताःगु खः ।

उगु इलय् यदि नेकपा (एमाले) सरकारय् वन वा सरकारया नेतृत्वयात धाःसा ‘झीसं लय् न्याद्वः भत्ता काये खनी, अथे जुयाः नेकपा (एमाले)यात हे भोट बीमाः’ धकाः सल्लाह याःपिं बुराबुरित नं यक्व हे दु । धाइ नापं कि ‘ध्यबा जक खनेवं महाःद्यःया नं स्वंगः मिखा कनी ।’ महाल्द्यःयात ला ध्यबाया लोभ दु धाःसा बुराबुरितय्त लोभ मजुइगु खँ हे मदु ।

‘थ्व ला स्वाभाविक खँ हे खःनि मखुला, ओलीजु ?’जितः नं लुमं कि चुनावया इलय् ७५ दँ दयेधुंकूम्ह जिमि मामं भोट कुर्कः वनेगु इलय् ‘व जिमित लय् न्याद्वः भत्ता बी धाःगु दलयात भोट बीगु खं ला’ धकाः धाःगु आः लुमंसे वयाच्वन । आः वयाः इपिं सकलें बुराबुरितय् म्हगस ‘उदायो सपना सबै हुरिले’ धाःथें जुल ! लय् न्याद्वः दां भत्ता बी धाःगु सरकारं मबिउसेंलि बुराबुरितय् चित्त स्याइगु ला स्वाभाविक हे खः ।

अथेला सरकारं चुनावी घोषणापत्रय् धाःथें वा बुराबरितय्सं आशा याःथें वृद्धभत्ता अप्वयेकाः छक्वलं न्याद्वः हे थ्यंकेमाः धइगु नं मदु । दँय्दसं भचाभचा यानाः अप्वयेका बिउसा जिउगु खः । आः वयाः न्याद्वँ भत्ता कायेगु आशा यानाच्वंपिं बुराबुरितय्सं ‘ओली सरकारं जिमित क्वाःक्वाः झंग लात’ धकाः नुगलय् स्याका च्वन ।

ओली नेतृत्वया सरकारं बुराबुरितय्त अथे क्वाःक्वाः झंगः लाःगु खनाः गुलिखे कांग्रेसया नेतातय्सं ‘न्याद्वः भत्ता कायेगु आशं एमालेयात भोट बिल आः खन मखुला कम्युनिष्ट सरकारया चर्तिकला’, ‘चोक्ता खान गएकी बुरी झोलमा डुबेर मरी’ धकाः ब्यङ्ग नकेगु यानाच्वंगु दु । खतुं नेपाली कांग्रेसं अथे यानाः खिसि याइगु ला जु हे जुल ।

अथेला केपी ओलि जोक व उखान टुक्का जक धयाः नागरिकतय्त न्ह्यइपुका च्वनीम्ह । उकिसनं ओली प्रधानमन्त्री जुइवं ‘न्याद्वः भत्ता दइगु आशं’ दंग जुयाच्वंपिंसं आः ‘ओली ला मलाःतले लाकेगु लाके धुकाः काकेगु’ ज्या धकाः याइम्ह खनी धकाः नं धायेगु याना हयाच्वंगु दु । थय्क स्वयेबलय् आः मेमेगु दलतय्सं नं अज्याःगुु मन्त्र ओलीजुपाखें सयेका कायेमाः थें च्वं ! अझला नेपाली कांगे्रसयात थज्याःगु मन्त्र माःथें च्वं ।

कांग्रेस सभापति शेरबहादुर देउवायात छगू सल्लाह ‘खालि कलाःया जक खँ न्यनेगु त्वःता ओलीजुं थें जिया थे मन्त्र सय्के मालका ।’धाथें झी प्रधानमन्त्री ओलीयात खँ नं गनं जक वःगु ? अथेला ‘ओलीया बोलिया ठेगान मदु’ धकाः नं धायेगु याः । बोलिया ठेगान मदुम्ह ओलीजुं धयादीगु दु, ‘आःया झिदँ दुने नेपाः स्वर्ग जुइ हँ !’

आः झी थेंज्याःपिं सोझासिधा नागरिकतय्सं थ्व खँ विचाः यायेमाःगु दु कि झिदँ लिपा नेपाः स्वर्ग जुइ वा मजुइ धइगु खँला लिपा हे जक सी दइ, तर बालकृष्ण ढुंगेल थेंज्याःपिनिगु निंतिं धाः नेपाः ला आः हे स्वर्ग खःनि मखुला ? प्रधानमन्त्रीजु, नेपाः देय् बालकृष्ण ढुंगेलयात जक मखु, ज्यानमारा नेता, भ्रष्टाचारी, घुस्याहा, ठग, तस्करी, गुण्डा, बलात्कारी, माफिया, भ्रष्ट नेता, फटाहा याइपिं, अपराधी अले छुं मसिउपिं बुराबुरितय्त क्वाःक्वाः झंग लाइपिनिगु निंतिं नं नेपाः देय् ला आः हे स्वर्ग खःनि मखुला ? प्रधानमन्त्रीजु !

नुगलय् ल्हाः तयाः धायेगु खःसा तसकं न्ह्यइयपुसे च्वंम्ह प्रधानमन्त्री वःगु दु । छाय्कि गबलें जोक्स न्यंकाः, गबले उखान टुक्का कना, गबलें कल्पनाया संसारय् चाःहिकाः झीत अलमल यानाः न्ह्यइपुसे च्वंकाच्वनी । अथे हे गबलें दछिया दुने नेपाःया थःगु हे लःजहाज चले यायेगु, गबलें रेल हयेगु, गबलें तुइनयात विस्थापित यायेगु, गबलें थःगु खानीया पेट्रोल छ्यलेगु अले झिदँया दुने नेपाःयात स्वर्ग दयेकेगु ! थ्व ल्याखं धायेगु खःसा ला झी सकलें तसकं हे भाग्यमानी ! छाय्धाःसां झीथाय् ओली थेंजाःम्ह प्रधानमन्त्री दु ।

उकिं आशा याये सदांसदां ओली हे प्रधानमन्त्री जुया च्वनेमा ! ओलि हे जक प्रधानमन्त्री जुयाच्वन धाःसा धाथें झिदँ लिपा नेपाः स्वर्ग जूगु स्वये दइ । अले झी स्वर्गय् च्वने दइ ! झिदँ लिपा झी स्वर्गय् ला च्वने दइ, तर स्वर्ग धइगु गज्यागु खः ? गथें च्वं ? गथे जुइ धकाः ओलीजुं गबलें नं धयामदी । छिकपिंसं सिउला थें स्वर्ग धइगु गथे च्वं ?