नेवाः एकता दिवस गुगु कथं हनेगु ?
नेपाल संवत ११४१ पोहेलाथ्व नवमि माघ ७ गतेया दिनय् नेवाःतय्सं झिंछक्वःगु नेवाः एकता दिवस आन्दोलन कथं हंगु खः । अबले ख्वना घोषणा पौ नं जारी याःगु खः । न्यागू बुँदाया उगु घोषणापतिइ नेवाः स्वायत्त राज्य प्राप्तिया आन्दोलनं दिपाः मकाःनिगु घोषणा याःगु खः । अथे हे नेवाः भूमिइ नेवाःतय्त विस्थापित यायेगु ज्याया विरुद्ध एकीकृत नेवाः आन्दोलन यायेगु घोषणा याःगु खः ।
नेवाःतय्त छुं नं कथंया विभाजन यायेगु षडयन्त्रया विरुद्ध सचेत जुयाः न्हापांनिसें कुबिकातःगु थजाः क्वजाःया जातीय विभाजन अस्वीकार यासें उकिया अवशेषयात न्हंकाः छ्वयेगु निंतिं मंकाःगु कुतः यानावनेगु प्रतिबद्धता प्वंकाः घोषणा याःगु खः । नेवाः एकताया आधार नेपालभाषा, नेवाः संस्कृति व नेवाः सम्पदा खः । थुकिया रक्षाया निंतिं छप्पँ छधी जुयाः न्ह्याः वनेगु घोषणा याःगु खः ।
अन्तर्राष्ट्रिय श्रम संगठन १६९ नापं आदिवासी अधिकार सम्वन्धी संयुक्त राष्ट्रसंघीय घोषणा पौ युएनडिप कार्यान्वयन याकेत मेमेगु आदिावासी जनजातितनाप छप्पँ जुया वनेगु घोषणा याःगु खः ।
लखौं स्वनिगःया आदिवासी नेवाःत दशरथ रंगशालाय् मुंगु न्हि खः पोहेलाथ्व नवःमि । जनस्तरपाखें नेवाः स्वायत्त राज्य घोषणा याःगु अले नेवाःतय्गु दथुइ विभेद मदु धकाः घोषणा याःगु दिं । पोहेलाथ्व नवःमि । उगु हे दिंयात लुमंकाः दँय्दसं नेवाः एकता दिवस हना वयाच्वंगु दु ।
दँय्दसं नेवाःतय्सं नेवाः एकता दिवस तिथि कथं उत्सवया रुपय् हना वयाच्वंगु दु । थुगुसी नं उगु हे कथं हनी तिनि । तर थुगुसी पोहेलाथ्व नवःमि थज्वःगु दिं ला गुगु दिंयात उत्सवया रुपय् हने हे फइमखु नेवाःतय्सं । व धइगु थुगुसी पुष २७ गते लाःगु दु । पुष २७ गते धइगु नेवाःतय्गु राज्य लाकाः काःम्ह अले नेवाःतय्त दमन याःम्ह नापं नेवाः विरोधी कथं म्हसिउम्ह पृथ्वीनारायण शाहया बुदिंया दिं । पृथ्वी नारायाण शाहं गुगु कथं गोरखा राज्य विस्तार यानाः नेवाःतय्त अन्यायय् यायेगु शुरु यात थौं तक नं नेवाः विरुद्ध उगु हे कथंया गतिविधि जुयाच्वंगु दु धकाः नेवाःतय्सं थुइका वयाच्वंगु दु ।
थुगुसी नेवाः एकता दिवस पोहेलाथ्व नवःमि पुष २७ गते उत्सवया रुपय् हन धाःसा उकिया सन्देश धइगु पृथ्वी नरायाण शाहया बुदिं हंगु कथंया सन्देश वनीगु अवस्था दु । राज्यं पृथ्वी नारायण शाहया बुदिंयात राष्ट्रिय एकताया दिवसया रुपय् हना वयाच्वंगु खःसा नेवाःतय्सं पुष २७ गतेयात हाकुगु न्हिया रुपय् कया वयाच्वंगु दु । मेमेपिं आदिवासी जनजातितय्सं नं पुष २७ गतेयात पृथ्वी जयन्ती धकाः राष्ट्रिय एकता दिवसया रुपय् गबलें हनेगु मयाः । पृथ्वीनारायण शाहया इलंनिसें हे आदिवासी जनजातितय्त राज्यं दमन यायेगु शुरु याःगु जूगुलिं हाकुगु दिंया रुपय् नाला वयाच्वंगु खः ।
स्वनिगःया आदिवासी नेवाःत नापनापं मेगु आदिवासी तामाङ्गतय्सं आःया वागमती प्रदेशया नां पहिचानया आधारय् तयेमाः धकाः ता ई न्ह्यवंनिसें सः थ्वयेका वयाच्वंगु खः । तर शासक वर्गं ला व हे पुष २७ गतेया दिनय् हे लाकाः नेवाः नापं तामाङ्गतय्गु भावनाय् लिच्वः लाकेगु कथं पहिचान विनाया वागमती प्रदेश धकाः नां तःगु खः । उकिं नं सीदु कि नेवाः आदिवासी जनजातितय्सं पृथ्वीनारायण शाहया बुदिंयात सामान्य रुपं नाला यंकेगु कुतः यात धाःसां थःत जूगु दमन ल्वःमंकेगु थें जुइ । नेवाः व आदिवासी जनजातियात दमन याःम्ह व्यक्ति धयाम्ह पृथ्वी नारायण शाह हे खः धकाः प्रमाणित यायेगु ज्या पुष २७ गते वागमती प्रदेश धकाः नां तयेगु ज्या याःगुलिं नं स्पष्ट जू । उकिं पृथ्वी नारायण शाहयात शासक वर्गं गुगु कथं कयाच्वंग दु धकाः अःपुक थुइकेफु ।
लिपांगु इलय् वयाः पृथ्वीनारायण शाहया जयजयकार याइपिं सतकय् झन् झन् सक्रिय जुयावःगु दु । उमिसं छ्यं ल्ह्वना हःगु दु । थुकिया मूल कारण धइगु हे वर्तमान राजनीतिक दलया नेतात खः । नेतातय्सं आदिवासी जनजातिया भावनाया अःखः अले नश्लीय चिन्तन दयेका ज्या याःगु नापं आदिवासी जनजातियात निगूगु दर्जाया नागरिक यानातःगुलिं हे थौं हाकनं जुजुवादीतय्सं छ्यं ल्ह्वाना हःगु खः ।
वास्तवय् थ्व देय्या राष्ट्रवादी धयापिं थनया आदिवासीत खः । आदिवासीतय्सं हे भूमि ल्यंकातःगु खः । आदिवासीतय्सं हे विश्वया न्ह्यःने पहिचान बियाच्वंगु खः । थुगु कथंया खँयात हाकुतिनाः नेतात अप्रत्येक्ष रुपं जुजुवादीयात हे बल जुइगु कथंया लँपुइ वंगुलिं समस्या ब्वलंगु खः ।
आः नेवाः एकता दिवस हनेगु सन्दर्भय् नेवाःतय्सं पुष २७ गते छु यायेगु धकाः बहस यायेमाःगु ई वःगु दु । उत्सवया रुपय् हन धाःसा जुजुवादीतय्गु ज्याझ्वः थें च्वनीगु अले नेवाः एकता दिवस हनेगु ज्या मयात धाःसां मजिउ । उकि आवंनिसें हे थुगुसीया झिंनिक्वःगु नेवाः एकता दिवस हनेगु बारे बहस सुरु यायेमाःगु ई वःगु दु ।
न्हापाया दँय् नेवाः समाज दुनेया फुक्क जातीय संगठन, नेवाः स्वायत्त राज्यया नितिं नीस्वंगु मंकाःगु मोर्चानिसें नेवाः अधिकारया नितिं सः थ्वयेका नापं आन्दोलन याना वयाच्वंंगु खलः पुचः नापं दुथ्याकाः नेवाः एकता दिवस आन्दोलनया रुपय् हंगु खः । अले ख्वना घोषणा पौ नं जारी याःगु खः । थुगुसी व हे ख्वना घोषणा पौयात कार्यान्वयन यायेगु कथंया सन्देश बिइगु ज्याझ्वः यानाः नेवाः एकता दिवस हनेगु गुलि तक पाय्छि जुइ धकाः बहस यायेमाःगु दु । थुगुसी संयुक्त राष्ट्रसंघंं आदिवासीतलिसे राज्यं न्हूगु सम्झौता यायेमाःगु कथंया सन्देश बियाः विश्व आदिवासी दिवस हंगु दु । उकिं थुगुसी नेवाःतय्गु मुद्दा नापं विश्व आदिवासी दिवसया झ्वलय् बिउगु नारायात ध्यानय् तयाः आन्दोलन कथं हनेगु नितिं थनिनिसें बहस यायेमाःगु ई वःगु दु ।
LEAVE YOUR COMMENTS