ट्रम्पं जून २० य् हे उत्तर कोरियाली नेता नापलाइगु

अमेरिकी राष्ट्र डोनाल्ड ट्रम्पं उत्तर कोरियाली नेता किम जङ अन लिसे जून १२य् हे नापलायेगु खँ धयादीगु दु । अमेरिका भ्रमणय् वनाच्वंम्ह उत्तर कोरियाया वरिष्ठ कुटनीतिज्ञलिसे ह्वाइट हाउसय् नापलायेधुंकाः राष्ट्रपति ट्रम्पं नेता अनलिसे जून १२ य् सिंगापुरय् नापलायेगु खँ धाःगु खः । थ्वयां न्ह्यः क्वःछिनातःगु शिखर वार्तायात ट्रम्पं हे एकपक्षीय रुपं दिकाबिउगु खः ।

ह्वाइट हाउसय् अमेरिकी राष्ट्रपतियात नापलासें उत्तर कोरियाली दूत जनरल किम योङ चोलं उत्तर कोरियाली नेतां
छ्वयाहःगु पौ नं ट्रम्पयात लःल्हाःगु खः । ट्रम्पं पत्रकारतलिसे खँ ल्हागु झ्वलय् न्हापां थ्व पौ तसकं रोचक दुगु धाःगु खः । तर लिपा हाकनं थःम्हं उगु पौ हे मचायेकानिगु खँ धाःगु खः ।ट्रम्पं सिंगापुरय् कोरियाली प्रायद्वीपया युद्ध औपचारिक रुपं क्वचायेकेगु समबन्धय् खँल्हाबल्हा जुइ धाःगु दु ।

सन् १९५०–५३ तकया कोरियाली ल्वापु समझदारीइ जक दिनाच्वंगु खः, थुकियात औपचारिक रुपं सन्धि यानाः क्वचायेकूगु मदुनि ।लिसे राष्ट्रपति ट्रम्पं सिंगापुरया छगू वार्तां उत्तर कोरियाया निशस्त्रीकरणया खँ क्वमचाइगु खँ नं स्वीकार याःगु दु । ट्रम्पं धाःगु दु, ‘जिं गुबलें नं थ्व खँ छगू वार्तां क्वजिइ धयागु मदु । जितः ताः थुकिं ज्या धाःसा न्ह्याः वनी ।

अले निगू पक्षया स्वापू बांलानावनी ।’ राष्ट्रपति ट्रम्पं परमाणु निःशस्त्री–करण यात धाःसा उत्तर कोरियाया आर्थिक पुनर्निर्माणय् ग्वाहालि यायेगु प्रस्ताव तःगु दु । अथेहे उत्तर कोरियाली नेता किमं नं थः परमाणु निःसशस्त्रीकरणय् प्रतिबद्ध दु धयाच्वंसां थःगु डिमान्ड छु धयागु धाःसा स्पष्ट यानाच्वंगु मदुनि ।