अफ्रिकाय् तसकं संक्रामक न्हूगु भेरियन्ट, बेलायत व जर्मनं उडान बन्द यात

एजेन्सी- तसकं संक्रामक कोरोना भाइरसया न्हूगु भेरियन्ट खनेदया वःगुलिं बेलायतं खुगू देय् लिसेया हवाइ उडान निलम्बन याःगु दु । बेलायतया स्वास्थ्य मन्त्री शाजिद जावेदं शुक्रवाः न्हिनय् १२ बजे निसें दक्षिण अफ्रिका, नामिबिया, जिम्बावे, बोत्स्वाना, लेसेथो व इस्वाटीटी यानाः खुगू देय्यात ह्याउँगु धलखय् तयाः अन जुइगु उडान फुक्कं दिकेगु व अन ब्वया वयेधुंकूपिं यात्रुतय्त क्वारेन्टाइनय् तयेगु धाःगु खः ।

अथेहे जर्मनीं नं दक्षिण अफ्रिकां जुइगु उडान प्रतिबन्ध तयेगु निर्णय याःगु दु । जर्मनीया कार्यवाहक स्वास्थ्य मन्त्री जेन्स स्पानं दक्षिण अफ्रिकां जुइगु उडान फुक्क दिकेगु व सम्भवत जःलाखःला देय्लिसेया उडान नं बन्द जुइफुगु खँ धयादीगु खः । लिसें वय्कलं जर्मन नागरिकतय्त धाःसा देशय् दुकायेगु खँ धयादीगु दु ।

बी १.१.५२९ नांया थ्व भेरियन्टयात आःतक खनेदुगु मध्ये दकलय् खराब धकाः विज्ञतय्सं धाःगु दु । विज्ञतय्सं थ्व भेरियन्टं खोप कायेधुंकूपिं मनूतय्के दुगु प्रतिरोधी क्षमतायात तकं त्वाःथलाबीफुगु खँ धाःगु दु । थ्व भेरियन्ट आःतक दक्षिण अफ्रिका, हंगकंग व बोत्स्वानाय् यानाः ५९ म्हेसिके खनेदयेधुंकूगु दु ।

बेलायती स्वास्थ्य मन्त्री जावेदं थ्व भेरियन्ट तसकं उत्परिवर्तनशील जूगु व न्हापाया डेल्टा भेरियन्ट स्वयां थुकिया उत्परिवर्तनशील गति निदुगं दयेफुगु खँ वैज्ञानिकतय्सं जानकारी बिउगु खँ नं धयादीगु दु ।
बेलायतं शुक्रवाः न्हिनय् निसें झिन्हु न्ह्यवनिसें उगु देय् भ्रमण याःपिं विदेशी व आयरल्यान्डया नागारिकतय्त बेलायत प्रवेशय् नं निषेध याःगु दु । थ्व भेरियन्ट दक्षिण अफ्रिकाय् तीव्र गतिं न्यना वनाच्वंगु लुइकूगु खः । थ्व भेरियन्ट न्हापाया स्वयां गुलि घातक धयागु स्पष्ट सीमदुनिगु खँ नं वैज्ञानिकतय्सं धाःगुदु

। विश्व स्वास्थ्य संगठनया विज्ञतय्सं थ्व भेरियन्ट बारे दक्षिण अफ्रिकी अधिकारीतलिसे शुक्रवाः निसें सहलह याःगु दु । वैज्ञानिकतय्सं थ्व भेरियन्ट शुरुवाती चरणय् दुगु व आःतक अप्वः थें विरामी दक्षिण अफ्रिकाया छगू प्रान्तय् जक केन्द्रीत जुयाच्वंगु जूसां याकनं हे थुकिया संक्रमण न्यना वनेफुगुखँ धाःगु दु ।