लेबनानय् चिकंया ट्यांकर विष्फोट जुयाः २० म्ह सित, ७९ घाःपाः

एजेन्सी- लेबनानया उत्तरी क्षेत्रय् च्वंगु अक्कर सहरय् आइतवाः सुथय् चिकंया ट्यांकर विष्फोट जुयाः २० म्ह मनू सीगु दुसा ७९म्ह घाःपाः जूगु दु ।

लेबनानया रेडक्रसं बिउगु जानकारीकथं रेडक्रसया टिमं घाःपाः जूपिंत अस्पतालय् थ्यंकेधुंकूगु दु । घाःपाः जूपि अप्वः धयाथें बांमलाक च्यायेधुकूगुलिं सीपिनिगु ल्याः थहां वनेफुगु रेडक्रसं धाःगु दु । लेबानानया अधिकारीं बिउगु जानकारीकथं सेनां त्लेइल नांयागु थासय् सुचुकातःगु चिकंया ट्यांकर नियन्त्रणय् कयाः पेट्रोल पम्पतय्त इनेत्यंबलय् थ्व बिष्फोट जूगु खः ।

घटनालिपा लेबानानया पूर्व प्रधानमन्त्री साद हरीरीं लेबनानया राष्ट्रपति माइकल एउनया राजीनामा फ्वंगु दु ।