बर्नह्याम बेलायतया न्हूम्ह प्रधानमन्त्री
लन्दन – बेलायतया सत्तारुढ लेबर पार्टीं एन्डी बर्नह्यामयात पार्टीया न्हूम्ह नेता व देशया न्हूम्ह प्रधानमन्त्रीया रुपय् औपचारिक पुष्टि याःगु दु । सत्तारुढ लेबर पार्टी शुक्रवाः छगू विशेष सम्मेलन यासें अनुभवी राजनीतिज्ञ बर्नह्यामयात पार्टीया न्हूम्ह नेतालिसें आः जुइम्ह प्रधानमन्त्रीया रुपय् औपचारिक पुष्टि याःगु खः ।
बर्नह्यामयात औपचारिक रुपं न्हूम्ह प्रधानमन्त्री पुष्टि याःसां थुकिया आधिकारिक घोषा धाःसा आः वइगु सोमवाः जक याइ । थ्व स्वयां न्ह्यः छुं प्रक्रियात पूवंकेमाःगु आवश्यक जूगुलिं सोमवाः जक आधिकारिक रुपं घोषणा याइगु जूगु दु ।
वइगु सोमवाः ‘टेन डाउनिङ स्ट्रिट’य् बेलायती संसदय् स्पष्ट बहुमत लेबर पार्टीया बर्नह्यामं किर स्टारमरया थाय् कायेगु तयारी यायेधुंकूगु दु । बेलायती संसदय् गुदँ लिपा पुनरागमन याःगु लछिया दुने हे बर्नह्यामं न्हूम्ह प्रधानमन्त्री जुइत्यंगु खः । करिब लछि न्ह्यः जक स्टारमरं पार्टी दुनेया विद्रोहया दथुइ राजीनामाया बीगु घोषणा याःगु खः ।
स्टारमरया राजीनामाया घोषणा लिपा म्यानचेष्टरया पुलांम्ह मेयर बर्नह्यामया निंतिं प्रधानमन्त्री जुइगु लँपु चाःगु खः । संसदीय सिटया निंतिं जूगु विशेष चुनाव त्याकाः बर्नह्याम प्रधानमन्त्रीया निंतिं योग्य जूगु खः । थुकियालिसें बर्नह्याम लिपांगु छगू दशकय दुने बेलायतया न्हय्म्हम्ह प्रधानमन्त्री जुइगु नं निश्चित जूगु दु । म्यानचेष्टरया स्वंगू कार्यकाल मेयर जुइधुंकूम्ह बर्नह्यामयात ‘उत्तरया जुजु’ नं धायेगु याः ।
बेलायतया संसदीय प्रणालीया कारणं मतदातातय्सं प्रधानमन्त्री जुइत सुं व्यक्तियात भोट बीमखु । इमिसं सरकार चले यायेत पार्टीयात भोट बीगु खःसा सत्तारुढ पार्टीं हे सुयात नेतृत्व याकेगु धइगु निर्णय याइ । पार्टी दुने बर्नह्याम विरुद्ध सुं नं न्ह्यःने मवयेवं निर्विरोध न्हूम्ह नेताया रुपय् ल्यःगु खः ।
थ्व स्वयां न्ह्यः सन् २०१० व २०१५ य् नं पार्टीया नेतृत्वय् वयेगु निंतिं कुतः याःम्ह बर्नह्याम अबलय् एड मिलिब्यान्ड व जेरेमी कोर्बिनलिसे पराजित जूगु खःसा आः स्वक्वःखुसी पार्टीया नेतृत्वय् वयेत सफल जूगु खः ।
बुधवाः जक पुलांम्ह फुटबल कासामि ग्यारी लिनेकरलिसेया पोडकाष्टय् बर्नह्यामं देय्यात न्हूगु आशा व आत्म विश्वासया न्हूगु हे अनुभूति बीकेमाःगु आवश्यक जूगु धासें बेलायत सही दिशापाखे वनाच्वंगु अनुभूति याकेगु धाःगु खः ।
LEAVE YOUR COMMENTS