सिपारः महाद्यःया साउने मेला शुरु
ख्वप (नेपालभाषा टाइम्स) – नेवाः समुदायं सिपारः महाद्यःया नामं म्हसिउगु डोलेश्वर महाद्यः (केदारनाथया छ्यं )या साउने मेला थनिंनिसें सुरु जूगु दु । थुगुसी थौं श्रावण १ गते निसें भाद्र ६ गते तक यानाः स्वीखुन्हुतक उगु मेला न्ह्याइ ।
मेलाया बारे जानकारी बीत ग्वसाःग्वःगु पत्रकार सम्मेलनय् थगुनेया मेलाय् १ करोड दां संकलन जूगु जानकारी बिसें थुगुसी व स्वयां अप्वः संकलन यायेगु लक्ष्य दुगु धाःगु दु । केदारनाथया छ्यं डोलेश्वर महादेव संरक्षण तथा विकास समितिया अध्यक्ष धर्मराज बस्नेतं प्रेस विज्ञप्ति ब्वनाः न्यंकादिसें श्रावण १ गते चन्द्रविनायक देगःपौ ख्यलं डोलेश्वर देगः तक कलश यात्रा, श्रावण २ निसें भाद्र ५ गते तक थीथी गुरुपिंपाखें प्रवचन व कलकार तपाखें भजन कीर्तन जुइ ।
कलश यात्राया उलेज्या बागमति प्रदेशया स्वस्थ्यमन्त्री किरण थापामगरं यानादीसा मेलाया लिपांगु दिं भाद्र ६ गते वार्षिक उत्सव ज्याझ्वः नगर प्रमुख बासुदेव थापाया प्रमुख आतिथ्यताय् जुइ ।
२०६६ भाद्र ६ गते डोले श्वर महादे व केदारनाथाया छ्यंया भाग धइकथं घोषणा जुइधुंकाः उगु इलंनिसें थन साउने मेला सुरु जूगु खः । मेलाया निंतिं १४ गू उपसमिति नीस्वना मेला ब्यवस्थापनया ज्या न्ह्यानाच्वंगु दु । थाय्थासय् सीसी क्यामेरा जडान, यातायात, शान्ति सुरक्षा, आर्थिक, मंच, स्वास्थ्य ब्यवस्था यायेगु ज्या जुयाच्वंगु पत्रकार सम्मेलनय् जानकारी बिउगु दु ।
पत्रकार सम्मेलनय् ८ वडा अध्यक्ष पुष्कर राज बस्नेतं राज्यया ५ करोड बजेटं यक्व ज्या जुयाच्वंगु व दँय् १ करोड दां आम्दानी यानाः समितिं डोलेश्वरया विकास निर्माणय् आपालं ज्या यानाच्वंगु कनादिल । पत्रकारतय् न्ह्यसःया लिसः बीगु झ्वलय् समितिया अध्यक्ष बस्नेतं थःपिंसं ३ गू करोड लागतय् ५० म्ह न्ह्यंगु वृद्धाश्रम चले यायेगु कुतः यानाच्वनागु व उकिया निर्माणय् आः संकलन दां लगानी याये गु जानकारी बियादिल ।
LEAVE YOUR COMMENTS