द्वाल्खाया हाथ्वँ द्यः सुरक्षित स्थानान्तरण
द्वाल्खा (नेपालभाषा टाइम्स) – द्वाल्खाया ऐतिहासिक, धार्मिक व सांस्कृतिक सम्पदाया ल्याखं महत्वपूर्ण हाथ्वँ द्यः (आकाश भैरव आजु द्यः)या मूर्ति सुरक्षित स्थानान्तरण याःगु दु । स्थानीय नक्छे प्रधानतय् कुल द्यःकथं कयातःम्ह हाथ्वँ द्यःया मूर्ति सुरक्षाया प्राथमिकता बियाः द्वाल्खा भिंद्यःया भण्डारय् स्थानान्तरण याःगु खः ।
सम्पदाया महत्वयात ध्यानय् तयाः आःयात हाथ्वँ द्यःया उगु मूर्ति सुरक्षाया निंतिं द्वाल्खा भिंद्यःया भण्डारय् तयागु सम्बन्धित पक्षं जानकारी बिउगु दु । द्यःया भण्डारय् तल धाःसा मूर्तिया सुरक्षा अझ प्रभावकारी जुइगु विश्वास याःगु दु ।
द्वाल्खा हाथ्वँ द्यः (आकाश भैरव आजु द्यः) स्थानीय नक्छे प्रधान परिवारया कुल द्यः खःसां थ्व मुक्कं द्वाल्खाया धार्मिक, सांस्कृतिक, ऐतिहासिक म्हसीकालिसे स्वानाच्वंगु सम्पदा खः । स्थानीय समुदायं उगु सम्पदाया संरक्षण, उचित व्यवस्थापन व भावी पुस्ता तकया निंतिं थुकिया महत्व ल्यंका तयेत सम्बन्धित निकाय व सरोकारवालां निरन्तर पहल यायेमाःगु आवश्यक तायेकूगु दु । मूर्तियात सुरक्षित थासय् तयेगु ज्यां द्वाल्खाया सांस्कृतिक सम्पदा संरक्षणय् महत्वपूर्ण योगदान जुइगु विश्वास नं याःगु दु ।
मूर्ति स्थानान्तरण यानाः सुरक्षित थासय् तयेगु ज्या सफल यायेत सहजकर्ताया भूमिका नक्छे प्रधान खलःया उदिप प्रधान व कृष्णकुमार प्रधानं म्हितादीगु खः । लिसें गुथि संस्थान द्वाल्खा व द्वाल्खा भीमेश्वर गुथि व्यवस्थापन समितिया नायः भरतबहादुर श्रेष्ठं थुगु ज्याया निंतिं समन्वय यानाः ग्वाहालि यानादीगु खः ।
स्वंगू दशक न्ह्यः खुया यंकाः अमेरिका थ्यंगु हाथ्वँ द्यःया उगु मूर्ति सामाजिक संजालया माध्यमं लुइकाः करिब स्वदँ न्ह्यः नेपाः लित हःगु खः । नेपाः लित हयाः राष्ट्रिय संग्रहालय छाउनीइ सुरक्षित तयातःगु उगु मूर्ति आवश्यक कानुनी प्रक्रिया पूवंकाः वंगु असारया न्हापांगु वाःपाखे स्वीदँ लिपा द्वाल्खाय् प्रतिस्थापन यायेत यंकूगु खः । ताःई न्ह्यःनिसें विदेशय् लानाच्वंगु मूर्ति नेपाः लित हयाः सम्बन्धित थासय् हयेखंगुलिं द्वाल्खामितय्सं तःजिक लसकुस याःगु खः ।
LEAVE YOUR COMMENTS