
युरोपेली संघं (इयुं) छक्व जक छ्यले जिउगु प्लाष्टिकया सामान उत्पादनय् प्रतिबन्ध तयेगु प्रस्ताव याःगु दु । चिचिधंगु प्लास्टिकया कुचां समुद्री जीवजन्तुयात हानि जुयाच्वंगु खँ पिहां वयाच्वंगु इलय् समुद्री वातावरणयात बचे यायेमाः धासें इयुं थ्व प्रस्ताव हःगु खः । थ्व प्रस्ताव कथं पेय पदार्थ त्वनेगु निंतिं छ्यलीगु स्ट्र, न्हाय्पं कुलिगु कटन बड, पेय पदार्थ घोले यायेत छ्यलीगु प्लाष्टिकया सामानया उत्पादन दिकेगु जुइ ।
इयुं सन् २०२५ तकया दुने फुक्कं प्लाष्टिकया सामान अनिवार्य रुपं हाकनं छ्यलेगु निंतिं मुंकेमाःगु प्रस्ताव नं याःगु दु ।इयुं हःगु थ्व प्रस्तावयात आः इयुलिसे आवद्ध २८ गू देय् व युरोपेली संसदं अनुमोदन यायेमानि । प्लाष्टिकया चिचिधंगु सामानय् प्रतिबन्ध तल धाःसा लाखौं टन कार्बन उत्सर्जन म्हो जुइगु व सन् २०३० तकया दुने २२ अर्ब युरो बराबरया पर्यावरणीय क्षति म्हो जुइगु इयुया अनुमान दु ।
अथेहे थ्व पलाखं उपभोक्तायात नं खुगू अर्ब युरों मल्याक बचत जुइगु अनुमान यानातःगु दु । इयुया अधिकारीतय्सं प्लाष्टिकया चिचिधंगु वस्तुइ प्रतिबन्ध तयेधुंकाः उकिया पलेसा कुहे जुइगु वा हाकनं छ्यलेजिउगु सामान उत्पादन व प्रवद्र्धन यायेमाःगु खँ धाःगु दु । इयुया प्रथम उपाध्यक्ष फ्रेन्स टिम्मरम्यान्सं धयादीगु दु, ‘निःसन्देह प्लाष्टिकजन्य फोहर छगू तःधंगु समस्या खः, युरोपेलीत जानाः थ्व समस्यालिसे ल्वाये फयेकेमाः ।’
थ्व प्रस्ताव पारित जुल धाःसा इयुया फुक्कं दुजः देसं छक्वः जक छ्यलाबुलाय् वइगु नसाज्वलं तयेगु कप, प्लेट लगायतया प्लास्टिया ज्वलं सुपरमार्केटय् छ्यलेगु कतौती यायेगु निंतिं प्रभावकारी पलाः ल्ह्वनेमाली ।
LEAVE YOUR COMMENTS