जिन्स पाइन्ट न्ह्यात धकाः १७ दँ दुम्ह मिसायात स्यानाबिल

एजेन्सी- भारतया उत्तर प्रदेशया सभ्रगी नांयागु गामय् जिन्स पाइन्ट न्ह्यात धकाः १७ दँ दुम्ह मिसायात वया हे छेँजःपिंसं स्यानाबिउगु दु । नेहा पासवान नांयाम्ह मिसामचायात जिसं पाइन्ट न्ह्यात धकाः वया हे बाज्या–अजि, कका–काकिं कथिं दायाः स्याःगु खः । सीम्ह मिसाया मामं बीबीसी हिन्दीयात बिउगु जानकारीकथं नेहां जिन्स न्ह्यात धकाः बाज्या–अजिलिसे ल्वापु जूगु व व हे ल्वापु तच्वः जुयाः नेहायात कथिं दाःगु खः । कथिं दायाः बेहोश जूम्ह नेहायात रिक्साय् तयाः अस्पाताल यंकूगु खःसां थःत धाःसा वया नापं मयंकूगु खँ मिसाया मां शकुन्तलां धाःगु दु ।

बीबीसीयात थप जानकारीबिसें मिसाया मामं थःथितिपिंत थ्व खँ कनाः नेहायात अस्पतालय् माःवनाबलय् मलूगु व कन्हय्कुन्हु गण्डक खुसिया ताँय् यखाना तःगु लूगु धाःगु खः ।

प्रहरीं घटनाय् दुथ्याःपिं झिम्हेसित मुद्दा तःगु दु । प्रहरीं हत्या व प्रमाण नष्ट याःगु द्वपं बियाः सीम्ह मिसाया बाज्या,अजि, कका,काकि, ककाया मस्त व रिक्साचालकयात मुद्दा तःगु दु । प्रहरीं बाज्या,अजि, ककाम्ह व रिक्सा चालकयात ज्वनेधुंकूगु दुसा मेपिंत मालेगु ज्या जुयाच्वंगु धाःगु दु । मिसाया अबु ज्या यायेत पञ्जाबय् वनाच्वंगु इलय् थ्व घटना जूगु खः । अबुम्हेसिनं थः मस्तय्त आखः ब्वंकेत स्वयाच्वंगु खःसा छेँजःपिंसं थुकिया नं विरोध यानाच्वंगु खः ।