छ्यंया मू ५० लाख डलर तयातःम्ह कुख्यात तस्कर ज्वन

एजेन्सी- कोलम्बियाया कुख्यात लागुपदार्थ तस्कर व तःधंगु आपराधिक पुचःया नायःयात ज्वंगु दु । ओटोनियल धकाः नांजाःम्ह कुख्यात लागुपदार्थ तस्कर डायरो एन्टोनियो उसागायात कोलम्बियाया छगू ग्रामीण लागां ज्वंगु अन्तर्राष्ट्रिय समाचार माध्यमं जानकारी बिउगु दु । ओटोनियलयात शनिवाः सेना, वायुसेना व प्रहरीं संयुक्त अपरेशन यानाः ज्वंगु खः । कोलम्बियाया सरकारं ओटोनियलया जानकारी बिउम्हेसित च्यागू लाख सिरपाया घोषणा यानातःगु खः । अमेरिकां उसागाया छ्यंया मू ५० लाख डलर तयातःगु खः ।

कोलम्बियाया राष्ट्रपति इभान ड्युकं ओटोनियलयात ज्वने धुंकाः टेलिभिजनपाखें सम्बोधन याःगु खः । राष्ट्रपति इभानं लागू वासः तस्कर विरुद्ध थ्व शताब्दीया हे तःधंगु सफलता जूगु नं धाःगु खः । । राष्ट्रपति इभानं ओटोनियलया तुलना सन् १९९०या लागू वासःया कुख्यात नाय पाब्लो एस्कोबारया पतनलिसे याःगु खः ।

राष्ट्रपति इभानं ओटोनियलयात ज्वंगुलिं ‘गल्फ क्लानया अन्त्य’ शुरु जूगु धाःगु दु । झिदँ न्ह्यः ओटोनियलं थः दाजुयात प्रहरी स्यानाबिइ धुकाः गल्फ क्लानया स्थापना याःगु खः । थ्व पुचःयात कोलम्बियां शक्तिशाली आपराधिक संगठनकथं कयातःगु खःसा अमेरिकां थुकियात सशस्त्र हिंसात्मक पुचःकथं कयातःगु खः । थ्व पुचलय् १८०० सिबें अप्व सदस्य दु ।

ओटोनियलयात मेगु राष्ट्रयात सुपुर्दगी यायेगु तयारी जुयाच्वंगु दु । ओटोनियलयात अमेरिकायात लःल्हाइगु सम्भावना दु ।