‘प्रधानमन्त्री शाहया भारत भ्रमण अनिश्चित हे तिनि’

येँ (नेपालभाषा टाइम्स) – भारतीय विदेश मन्त्रालयया प्रवक्ता रणधीर जयसवालं नेपाःया प्रधानमन्त्री बालेन शाहं पदभार ग्रहण याःगु इलय् हे भारत भ्रमणया निंतिं ब्वनापौ बीधुनागु जूसां प्रधानमन्त्री शाहया भारत भ्रमण गबलय् जुइ धयागु खँ अझं अनिश्चित हे दनिगु खँ धयादीगु दु ।

म्हिगः जूगु नियमित पत्रकार सम्मेलनया झ्वलय् पत्रकारतय्सं न्यंगु न्ह्यसःया लिसः बीगु झ्वलय् वय्कलं प्रधानमन्त्री शाहया भ्रमण अनिश्चित हे तिनिगु खँ धयादीगु खः ।

म्हिगःया पत्रकार सम्मेलनय् नेपाःया प्रतिनिधिसभाया सोमवाः च्वंगु बैठकय् सन् १८१६ या सुगौली सन्धिया सक्कल प्रतिवेदनयात कयाः नं चर्चा जूगु धासें पत्रकारतय्सं उगु सन्धिया सक्कल प्रति सुयाके दु धकाः न्यंगु न्ह्यसलय् प्रवक्ता जयसवालं धयादिल, ‘भारत व नेपाः दथुइ बांलाःगु सम्बन्ध दु । गुलिखे विषयय् सहमति मजूगु जुइफु । तर अज्याःगु मुद्दाया निंतिं निगू पक्षीय संयन्त्र दु । उकियापाखें हेखँल्हाबल्हा यायेगु जुइ ।’

नेपाः-अंग्रेज दथुइ युद्ध दिकेत सन् १८१६ य् सुगौली सन्धि जूगु खः । उगु सन्धिं नेपाःया पश्चिम-दक्षिण सीमा क्वःछिउगु खः । उगु हे सन्धि लगायतया प्रमाणया आधारय् नेपालं २०७७ य् लिम्पियाधुरा सहितया नक्सा जारी याःगु खः । सन्धिइ काली पूर्वया भूभाग नेपाःया जूगु खँ न्ह्यथनातःगु दु । विदेश मन्त्रालयया प्रवक्ता जयसवालं नेपाःया प्रधानमन्त्री शाह व भारती राजदूत नविन श्रीवास्तव नापलाःगु खँयात नं न्ह्यथनादीगु दु ।