‘संसफो नं सरकारय् वनेफु’

येँ – संविधान संशोधन यायेगु खँय् ग्यारेन्टी दत धाःसा संघीय समाजवादी फोरम नं सरकारय् वनेगु खँ पार्टीया अध्यक्ष उपेन्द्र यादवं धयादीगु दु । विराटनगरय् पार्टीपाखें याःगु पत्रकार सम्मेलनय् न्ववायेगु झ्वलय् वय्कलं उगु खँ धयादीगु खः ।
वय्कलं संविधान संशोधन, सरकारय् पार्टीया भूमिका व संघीयता कार्यान्वयन थेंज्याःगु मुद्दा सम्बोधन जुल धाःसा थःपिं नं सरकारय् वने फइगु खँ नं स्पष्ट यानादीगु दु ।

संविधानयात मधेशी, आदिवासी जनजाति फुकसिया सर्वस्वीकार्य व अपनत्व कायम यायेगु निंतिं संविधान संशोधन यायेमाःगु खँ कनादिसें वय्कलं भारतीय प्रधानमन्त्री नरेन्द्र मोदीया जनकपुरय् भ्रमणया झ्वलय् मुख्यमन्त्रीया अभिव्यक्तियात कयाः विवाद यानाच्वनेगुया अर्थ मदुगु बिचाः नं प्वंकादिल ।