ने. सं. ११४६ अनलाथ्व दशमी -

लिपि गुथिया रञ्जना लिपि किपा च्वज्या कासा

येँ (नेपालभाषा टाइम्स) – नेपाल लिपि गुथिया ४्र्र६ दँ बुन्हिया लसताय् वंगु शनिवाः छन्हुं हे स्वंगू थीथी ज्याझ्वः जुल । नेपाःया मौलिक लिपि संरक्षण, संवद्र्धन व प्रवद्र्धन यायेगु तातुना नीस्वनातःगु लिपि गुथि ४६ दँ बुन्हिया लसताय् र ञ्जना लिपि किपा च्वज्या कासा, नेवाः जागरणय् ल्याय्म्ह पुस्ताया भूमिका विषयय् गोष्ठि व लिपि प्रवद्र्धनय् भूमिका म्हितादीपिंत हनेज्या याःगु खः ।

न्हापांगु ज्याझ्वःकथं जनबहाः द्यःया परिसरय् थीथी ब्वने कुथिया ब्वँमिपिनि दथुइ नेपाल लिपि किपा च्वज्या कासा जूगु खः । येँ महानगरपालिकाया सहकार्यय् महानगर दुनेया सामुदायिक व संस्थागत ब्वने कुथिया ब्वँमिपिनि दथुइ जूगु लिपि किपा च्वज्या कासाय् नीप्यंगू ब्वने कुथिया ब्वँमिपिंसं ब्वति काःगु खः ।

नेपाःया थःगु हे मौलिक रञ्जना लिपिया संरक्षण, संवद्र्धन व प्रवद्र्धन यायेगु ल्याखं ब्वने कुथिया ब्वँमिपिंत रञ्जना लिपिया किपाबारे थुइकेगु, स्यने कने यायेगु ल्याखं उगु कासा ग्वसाः ग्वःगु खः । छगू ब्वने कुथिपाखें स्वम्ह ब्वँमिपिं दुथ्याकाः मंकाःकथं छपाः किपानापं रञ्जना लिपि च्वयेगु ज्या जूगु खः ।

येँ महानगरपालिकाया कार्यवाहक प्रमुख सुनिता डंगोलं लिपि किपा च्वज्या कासाय् ब्वति कयादीपिं सकल ब्वँमिपिंत लुमन्ति चिंलिसें रञ्जना लिपि, नेपाल लिपिया वर्णमाला, ज्वज्वलपा शिवविलास सफू लःल्हानादीगु खः ।

वयां लिपा केशचन्द्र पारावर्त महाविहार इतुंबहालय् जूगु ज्याझ्वलय् विशेष पाहांकथं झायादीम्ह नेपालभाषा एकेदेमिया चान्सलर लिसें नेवाः देय् दबूया संरक्षक मल्ल के. सुन्दरं लिपि किपा च्वज्या कासाय् उत्कृष्ट जूपिंत सिरपाः लःल्हानादीगु खः । कासाय् श्री गीतामाता माध्यामिक विद्यालय न्हाप, शंकारी स्कुल लिउ, बालबाटिका विद्यालय लियांलिउ लाःगु खःसा जगतसुन्दर ब्वने कुथि व ग्यालेक्सी स्कुलं हःपाः सिरपाः त्याकेत ताःलाःगु खः । वय्कःपिंत विशेष पाहां मल्लं सिर पाः व गुथिया नायः निरञ्जन ताम्राकारं देछा लःल्हानादीगु खः ।

थुगु कासाय् लिपि गुथिया प्राज्ञलिसें उपप्राध्यापक शरद कसाः, वरिष्ठ क्यालिग्राफर आशाकाजी थकु, नेपाल ललितकला प्रज्ञा प्रतिष्ठानया सौरगंगा दर्शनधारी व योङ्ग पिकासो या नायःलिसें प्राध्यापक अजय देसार निर्णायककथं च्वनादीगु खः ।

मेगु ज्याझ्वःकथं ‘नेवाः जागरणय् ल्याय्म्ह पुस्ताया भूमिका’ विषयय् जूगु गोष्ठिइ कन्टेन्ट क्रियटर सन्ध्या ब्याञ्जुं प्रस्तुति बियादीगु खः ।

ज्याझ्वलय् नवासें विशेष पाहां मल्ल के. सुन्दरं नेपालभाषा, लिपि, संस्कृतियात सामाजिक संजालय् कन्टेन्ट दयेकाः प्रचार प्रसार याये माःगु खँय् बः बियादिल । लिसें वय्कलं सामाजिक संजालपाखें विशेष यानाः ल्याय्म्ह पुस्तायात राजनीति, सांस्कृतिक रुपं आकर्षित यानाच्वंगु न्ह्यथँसें थुकियात सदुपयोग यानाः न्ह्याः वने माःगु धारणा तयादिल ।

दकलय् लिपांगु ज्याझ्वःकथं र ञ्जना लिपिया सुचं ग्वरः तयाः लिपि प्रवद्र्धनय् महत्वपूर्ण भूमिका म्हितादीपिं येँ महानगरपालिका २३ वडाअध्यक्ष मचाराजा महर्जन व यल महानगरपालिका १६ वडाअध्यक्ष निर्मलरत्न शाक्ययात हनेज्या याःगु खः । गुथिया नायः ताम्राकार या सभापतित्वय् जूगु ज्याझ्वलय् वय्कःपिंत गुथिया दांभरि प्रमिला ताम्राकारं दोसल्ला न्ययेकादीगु खःसा निवर्तमान नायः अनिल स्थापितं हनापौ देछानादीगु खः ।