चुनाव जूसा प्रधानन्यायाधीश अन्तरिम प्रधानमन्त्री जुइगु !
येँ (नेपालभाषा टाइम्स) – संसद विघटन लिपा यदि नेपाः धाथें चुनावय् वनीगु जुल धाःसा सर्वोच्च अदालतया वर्तमान प्रधानन्यायाधीश चोलेन्द्र शम्शेर जबरा अन्तरिम सरकारया प्रधानमन्त्री जुइगु खः ? नेपाः दुने थुकिया बारे खास चर्चा जूगु मदुनि, तर भारतीय संस्थापन पक्षया बिचाः क्वबीपिं सञ्चार माध्यमतय्सं धाःसा थुकिया सम्भावना व्यक्त याना हये धुंकूगु दु ।
टाइम्स अफ इण्डियाया अनलाइन संस्करण् पिदंगु छगू समाचारय् थ्व सम्भावना प्वंकातःगु खः । यदि चुनावय् वनेमाःगु अवस्था पिहां वल व उगु इलय् तटस्थ सरकारं जक चुनाव याये दइ धइगु खँ पिहां वल धाःसा प्रधानन्यायाधीशयात प्रधानमन्त्री दयेकाः अन्तरिम सरकार गठन जुइ फइगु खँ समाचारय् न्ह्यथनातःगु दु ।
न्हू दिल्ली डेट लाइन तयाः इन्द्रणी बागचीं च्वःगु उगु समाचारय् यदि प्रधानन्यायाधीशया अध्यक्षताय् सरकार अन्तरिम सरकार वल धाःसा उकिं नेपाःया राजनीतिक वातावरण मेकथं हिले फुगु खँ नं धयातःगु दु । लिसें समाचारय् संसद विघटन लिपा प्रधानमन्त्री ओलीं मई महिनाय् याये धाःगु चुनावयात नं खुला घ्वानाः नोभेम्बरपाखे जक याये फइगु सम्भावना नं व्यक्त यानातःगु दु ।
भारतीय सञ्चार माध्यमय् वःगु थ्व समाचारं नेपाःया वर्तमान राजनीतिक संकटय् प्रधानमन्त्री केपी ओली व सर्वोच्च अदालतया प्रधानन्यायाधीश चोलेन्द्र शम्शेर जबरा दथुया ‘गठबन्धन’ पुष्टि याइगु खँ विज्ञतय्सं धयाहःगु दु । प्रधानमन्त्री ओलीपाखें प्रधानन्यायाधीश जबरायात अन्तरिम सरकारया प्रधानमन्त्री जुइ दइगु प्रलोभन क्यनाः थःगु पक्षय् हयेधुंकूगु विश्लेषण थन जुयाच्वंगु दु । थ्व विश्लेषणयात तिबः जुइ कथं थौंकन्हय् सर्वोच्चं अदालतं नं अज्याःगु हे भूमिका हयाच्वंगु अनुभव विपक्षी दलतय्सं यानाच्वंगु दु ।
संसद विघटन विरुद्ध सर्वोच्च अदालतय् दायर जूगु रिटयात सर्वोच्चं वेवास्ता याये कथं ‘हेर्न नभ्याउने’ धकाः लिछ्यानाच्वंगु कारणं प्रधानमन्त्री व प्रधानन्यायाधीश दथुइ छुं कथंया ‘गठबन्धन’ कायम जूगु अनुमान याना हःगु दु । प्रम ओलीं संसद विघटन यानाः चुनाव घोषणा याःबलय् हे थ्व ज्या ‘सेटिङ’ मिले यानाः न्ह्याकूगु जूगुलिं सर्वोच्चं संसद विघटनयात वैधता बीगु अनुमान याना हयाच्वंगु दु । सर्वोच्चपाखें थुकियात कयाः गज्याःगु फैसला बी धइगु खँय् जुयाच्वंगु शंकायात तिबः जुइ कथं थौंकन्हय् जुयाच्वंगु अदालती गतिविधिं पुष्टि यानाच्वंगु दावी विज्ञ सूत्रं याःगु दु ।
लुमंकेबहः जू, संविधानसभाया निक्वःगु चुनाव जूबलय् नं तत्कालीन प्रधानन्यायाधीश खिलराज रेग्मीयात हे प्रधानमन्त्री दयेकाः चुनाव सरकार गठन याःगु खः ।
LEAVE YOUR COMMENTS