सम्पदा मार्ग दुनेया सम्पदाया किपा संकलन

येँ – विश्व सम्पदाया धलखय् दुथ्यानाच्वंगु निगू सम्पदास्थल हनुमानध्वाखा लाय्कूनिसें स्वयम्भूतकया दुने लाःगु थीथी थासय् च्वंगु सम्पदाया किपा संकलन याःगु दु । विश्व सम्पदा दिवसया लसताय् विश्व सम्पदा उत्सव मूल समारोह समितिया ग्वसालय् छवाःयंकं थीथी ज्याझ्वः यानाः हनेगु झ्वलय् म्हिगः उकथं निगू सम्पदास्थल दुने लाःगु थीथी सम्पदाया किपा संकलन याःगु खः ।

विश्व सम्पदा दिवसया झ्वलय् थीथी संचारमाध्यमया करिब नीम्ह फोटो पत्रकारतय्सं हनुमानध्वाखानिसें स्वयम्भू तकया सम्पदाया किपा संकलन याःगु खः । मूल समारोह समितिया ग्वसालय् सम्पदा क्षेत्रया भ्रमण यायेगु झ्वलय् फोटो पत्रकारतय्सं ऐतिहासिक, सांस्कृतिक, धार्मिक व पुरातात्विक ल्याखं महत्वया सम्पदास्थलया किपा काःगु खः ।

थनया मरुगणेद्यःया न्ह्यःनें शुरु जूगु सम्पदा फोटो पत्रकार यात्रा मरुहिति, सन्तानेश्वर महाःद्यः, मरुबही, बन्जाःहिति, न्यत, लोकेश्वर गल्ली, बुरांख्यः दलू चौतारा, भुइख्यः जुयाः २.२ किलोमिटरया यात्रा लिपा स्वयम्भूइ थ्यंकाः क्वचायेकूगु खः । फोटो पत्रकारतय्सं काःगु किपा छुं दिं लिपा ब्वज्याय् तइ ।

विश्व सम्पदा उत्सव मूल समारोह निर्देशन कमिटीया संयोजक क्षेत्र नं ८ या प्रतिनिधिसभा सदस्य जीवनराम श्रेष्ठं नेपाःया सम्पदायात अन्तर्राष्ट्रियस्तरय् तकं प्रचार प्रसार यायेत फोटो पत्रकारतय्सं संकलन याःगु किपात तःधंगु ग्वाहालि जुइगु विश्वास प्वंकादीगु दु । अथे हे समितिया सचिव दिल्लीरत्न तुलाधरं सम्पदाया महत्व व उकिया संरक्षणय् न्हू पुस्तयात आकर्षित यायेगु निंतिं नं सम्पदा सम्बन्धी जनचेतनामूलक ज्याझ्वः याना वनेमाःगु खँय् बः बियादिल ।

विश्वन्यंकंया सम्पदाया पहिचान यायेगु व उकिया संरक्षण यायेगु उद्देश्यं दँय्दसं अप्रिल १८ कुन्हु अन्तर्राष्ट्रि रुपं हे विश्व सम्पदा न्यायेकेगु याना वयाच्वंगु दु । नेपालय् वंगु बैशाख २ गतेनिसें छवाःयंकं थीथी ज्याझ्वः थ्व दिवस हनाच्वंगु दुसा म्हिगः फोटो पत्रकार सम्पदा यात्रा ज्याझ्वः जूगु खः । विश्व सम्पदा दिवसया लसताय् वइगु बैशाख ८ गते शनिवाःकुन्हु मू ज्याझ्वः जुइ ।

उकुन्हु हनुमानध्वाखानिसें स्वयम्भू तकया सम्पदा पदयात्रा जुइ । हनुमानध्वाखाय् जुइगु ज्याझ्वःया उलेज्या संस्कृति, पर्यटन व नागरिक उड्डयन मन्त्री रवीन्द्र अधिकारी उलेज्या याइगु ज्याझ्वः दुसा स्वयम्भूइ जुइगु समापन ज्याझ्वलय् प्रधानमन्त्री केपी ओली मूपाहांकथं झायादी ।

स्वनिगःया स्वंगुलिं जिल्लाया लाय्कू, स्वयम्भू, खास्थि, पशुपति व ख्वपया चाँगुनारायण युनेस्कोया विश्व सम्पदाया धलखय् दुथ्यानाच्वंगु दु । थ्व बाहेकं नेपाःया सगरमाथा राष्ट्रिय निकुञ्ज, गौतम बुद्धया जन्मस्थल लुम्बिनी, चितवन राष्ट्रिय निकुञ्ज नं सांस्कृतिक, धार्मिक, प्राकृतिक सम्पदाया रुपय् विश्व सम्पदाया धलखय् दुथ्यानाच्वंगु दु ।

सन् १९७९ लय् स्वनिगः दुनेया सम्पदा विश्व सम्पदाया धलखय् दुथ्याःगु खः । चितवन राष्ट्रिय निकुञ्ज दकलय् न्हापां विश्व सम्पदाया धलखय् दुथ्याःगु सम्पदाया रुपय् कायेगु याः । थ्व निकुञ्ज एसियाया हे संरक्षित क्षेत्रमध्ये महत्वपूर्ण क्षेत्र नं खः ।