जनबहाःद्यःया आगंछेँ पुनःनिर्माण क्वचाइन

येँ / वि.सं. २०७२ या तःभुखाचं स्यंगु जनबहाःद्यःया आगंछेँ पुन–र्निर्माणया ज्या अन्तिम चरणय् थ्यंगु दु । आगंछेँ पुनर्निर्माणया ज्या ८० प्रतिशत क्वचायेधुंकूगु दु । आगंछेँ पुनर्निर्माणया निंतिं स्थानीय सरोकारवालात जानाः दयेकूगु श्री आर्यावलोकितेश्वर सुधार समूहं जनबहाद्यःया न्हवंया इलय् तक छेँ दयेके क्वचायेकेगु लक्ष्य तयातःगु दु ।

समूहं ३ करोड ५० लाख तकाया लागतय् आगंछेँ पुनर्निर्माण सुरु याःगु खः । थुकिया निंतिं येँ महानगरपालिकां सिँया निंतिं ८० लाख व पौया निंतिं ८५ लाख तका ग्वाहालि बिउगु खःसा बागमति प्रदेश सरकारं ५० लाख तका ग्वाहालि बिउगु खः । मगाःगु ध्यबा फुक्कं स्थानीयवासी, भक्तजन व दातातय् ग्वाहालिं मुंकागु खँ येँ महानगरपालिका २५ वडाया अध्यक्ष व समूहया नीलकाजी शाक्यं कनादीगु दु । आगंछेँ पुनर्निर्माणया निंतिं द्रव्यमान सिंह तुलाधर व नवीन तुलाधरपिंसं विशेष ग्वाहालि बिउगु खँ समूहं धाःगु दु ।

थ्व आगंछेँ ९० सालया भुखाचं नं बांमलाक स्यंगु खःसा उबलय् हथासं स्यंल्ह्वने ज्या याःबलय् प्राचीन वास्तुकला हे मदयेक दयेकूगु जूगुलिं थ्व पालय् पुनर्निर्माण यानाबलय् पुलांगु वास्तुकला पुनस्र्थापित यानाः दयेकागु खँ नं वय्कलं कनादिल ।

२०७२ सालया भुखाचं हे स्यंगु जनबहाःद्यःया देगः प्रवलीकरणया ज्या धाःसा भारत सरकारया ग्वाहालिं जुइगु खँ धाःगु दु । थुकिया निंतिं राष्ट्रिय पुनःनिर्माण प्राधिकरण व भारत सरकार दथुइ न्याला न्ह्यव हे सम्झौता जुइधुंकूगु खँ धाःगु दु ।

केन्द्रीय आयोजना कार्यान्वयन एकाई (भवनं) देगः प्रवलीकरणया निंतिं ठेक्का ज्या सुरु यायेधुंकूगु दु । वइगु लत्या दुने देगः प्रवलीकरण ज्याया निंतिं निर्माण व्यवसायी ल्ययेधुंकीगु खँ एकाइ प्रमुख श्यामकिशोर सिंहं धयादीगु दु । (रासस)